ఈ ఏడాది చివరినాటికి వాహనదారులకు దుబాయ్‌ మరియు అబుదాబీలను కలిపే హైవేపైకి అనుమతినివ్వనున్నారు. 62 కిలోమీటర్ల మేర విస్తరించిన ఈ హైవే రెండు వైపులా నాలుగు లేన్లను కలిగి ఉంటుంది. నిర్మాణ పనులు 83 శాతం పూర్తయ్యాయని అబుదాబీ జనరల్‌ సర్వీసెస్‌ కంపెనీ (ముసానదా) వెల్లడించింది. సెయిహ్‌ షుయైబ్‌ నుంచి అబుదాబీ మీదుగా ఈ హైవే ప్రారంభమవుతుంది. ఫారెస్ట్‌ బెల్ట్‌, అల్‌ మహా ఫారెస్ట్‌, కిజాద్‌, ఖలీఫా సిటీ, అల్‌ అజ్బాన్‌ రోడ్‌.. ఇలా సాగుతుంది ఈ హైవే మీద ప్రయాణం. 1.2 బిలియన్‌ దిర్హామ్‌లు వెచ్చించి ఈ ప్రాజెక్టుని ప్రారంభించారు. ఈ హైవే పై ఆరు ఇంటర్‌ఛేంజెస్‌, ఆరు అండర్‌గ్రౌండ్‌ పాసెస్‌ ఉన్నాయి. గంటకు 8000 వాహనాల కెపాసిటీతో, 2000 వాహనాలు ప్రతి లేన్‌పై వెళ్ళే సామర్థ్యంతో ఈ హైవేని రూపొందించారు. అబుదాబీ మరియు దుబాయ్‌ మధ్య ప్రయాణానికి ఈ హైవే ఎంతో ఉపయుక్తంగా ఉంటుందని అధికారులు చెప్పారు.