కంటెంట్ వున్న కథలకు పెట్టింది పేరు హీరో నారా రోహిత్. చేసినవి తక్కువ సినిమాలే అయినా గుర్తుండిపోయే సినిమాలు చేశాడు. కొన్ని సినిమాల్లో గెస్ట్ రోల్స్ పోషించి తనదైన ప్రత్యేకతను చాటుకున్నాడు.
అయితే, ఈ మధ్య పెద్దగా నారా రోహిత్ సినిమాలు పాపులర్ కావడం లేదు. దాంతో కాస్త బ్రేక్ తీసుకున్నాడు. మళ్లీ ఇప్పుడే ఓ ప్రత్యేకమైన సినిమాతో రాబోతున్నాడు.
నారా రోహిత్ కెరీర్ తొలి నాళ్లలో చేసిన సినిమా ‘ప్రతినిధి’. ఈ సినిమా అప్పట్లో ఓ సంచలనం. అప్పటి రాజకీయ పరిస్థితుల్ని సూటిగా ఎత్తి చూపిన సినిమా ఇది. మీడియాని కూడా ఏకి పారేసింది.
అలాంటి కథనంతోనే ఆ సినిమాకి సీక్వెల్‌గా రాబోతోంది ‘ప్రతినిధి 2’. ఈ సినిమాతో రీపోర్టర్ మూర్తి దర్శకుడిగా పరిచయమవుతున్నాడు.చిత్రానికి కుమార్ రాజా బత్తుల, ఆంజనేయులు శ్రీ తోట, సురేంద్రనాథ్ బొల్లినేని నిర్మాతలు.
‘ఈ దేశం అప్పు ఎంత.?’ ఇలాంటి ప్రశ్నలు హీరో నోటి వెంట ఈ సినిమా ద్వారా పలికించబోతున్నాడట మూర్తి. ప్రస్తుత రాజకీయ పరిణామాల నేపథ్యంలో ఈ సినిమా ఎలాంటి సంచలనాలు రేకెత్తిస్తుందో చూడాలి మరి.