యూఏఈ: యూఏఈలోని నివాసితులు సగటున సంవత్సరానికి Dh7,600 ఆరోగ్య సంరక్షణ కోసం ఖర్చు పెడుతున్నారట.  ఈ మేరకు బ్రాండ్ ఫైనాన్స్ కొత్త నివేదికను విడుదల చేసింది. అత్యధిక సంఖ్యలో 81 శాతం నివాసితులు యూఏఈ ఆరోగ్య సంరక్షణ వ్యవస్థ పట్ల సంతృప్తిని వ్యక్తం చేశారు. 10లో దాదాపు 8 మంది ( 81 శాతం) దేశ ఆరోగ్య సంరక్షణ వ్యవస్థ నుండి లబ్ధి పొందుతున్నట్లు తెలిపారు. 84 శాతం మంది నివాసితులు గత దశాబ్దంలో ఎమిరేట్స్‌లో ఆరోగ్య సంరక్షణ నాణ్యత మెరుగుపడిందని నమ్ముతున్నారు.   ఆరోగ్య సంరక్షణ వ్యవస్థలో యూఏఈ పెట్టుబడులు అద్భుతమైన ఫలితాలను ఇస్తున్నాయని బ్రాండ్ ఫైనాన్స్ మేనేజింగ్ డైరెక్టర్ రిచర్డ్ హైగ్ అన్నారు. ప్రతి వ్యక్తికి సగటు వార్షిక ఆరోగ్య సంరక్షణ ఖర్చు Dh7,600 ($2,100)తో 64 శాతం మంది నివాసితులు ఇప్పటికీ యూఏఈ ఆరోగ్య సంరక్షణను ఖరీదైనదిగా భావిస్తున్నారని హై పేర్కొన్నారు. ఈ సర్వేలో 2వేల మంది నివాసితులు పాల్గొన్నారు.  ఇందులో 21 శాతం పౌరులు కాగా, 79 శాతం ప్రవాసులు ఉన్నారని సర్వే సంస్థ వెల్లడించింది.   

యూఏఈ నివాసితులలో 78 శాతం మంది దేశంలో ఆరోగ్యకరమైన జీవనశైలిని, వ్యాయామం, ఆరోగ్యకరమైన ఆహారం మరియు మరిన్నింటి ద్వారా జీవించడం చాలా సులభం అని భావిస్తున్నారు. జిమ్‌లు, ఉద్యానవనాలు, ఆరోగ్యకరమైన ఆహారం మొదలైనవి చాలా మందికి తక్షణమే అందుబాటులో ఉన్నాయని అనేకమంది తెలిపారు. బ్రాండ్ ఫైనాన్స్ సర్వే ప్రకారం.. దుబాయ్‌లో ఆస్టర్ అత్యధిక రేటింగ్ పొందిన బ్రాండ్‌గా నిలిచింది. అయితే షేక్ ఖలీఫా (సెహా) దేశవ్యాప్తంగా అత్యంత మెరుగైన వ్యక్తిగత ఆసుపత్రిగా గుర్తింపు పొందింది. నేషనల్ హెల్త్ ఇన్సూరెన్స్ కంపెనీ (డామన్) అనేది జాతీయంగా ఉత్తమ ఆరోగ్య బీమా బ్రాండ్ నిలిచింది.