మడగాస్కర్‌లో బందిపోట్లు దుశ్చర్యకు పాల్పడ్డారు. దారిదోపిడి కోసం ఓ వాహనాన్ని అడ్డుకుని.. అందులోని ప్రయాణికులను దారుణంగా చంపేశారు. స్థానిక అధికారులు తెలిపిన వివరాల ప్రకారం..
32 మంది ప్రయాణికులతో టొలియారా నుంచి బెరోరోహా వెళ్తున్న ఓ ప్రైవేట్‌ టాక్సీని బందిపోట్లు అడ్డుకున్నారు. దీంతో వాహనాన్ని వారి నుంచి తప్పించేందుకు డ్రైవర్‌ ప్రయత్నించగా.. బందిపోట్లు టాక్సీ టైర్లను తుపాకీతో పేల్చారు. అనంతరం వాహనంలోకి చొరబడి ప్రయాణికులపై కాల్పులు జరిపారు. ప్రయాణికుల్లో 10 మంది చిన్నారులు కూడా ఉన్నట్లు అధికారులు తెలిపారు. బందిపోట్ల దాడిలో 31 మంది ప్రాణాలు కోల్పోగా ఓ వ్యక్తి తీవ్రంగా గాయపడి ప్రాణాలతో బయటపడ్డాడు.
అనంతరం ప్రయాణికుల బ్యాగులు, జేబుల నుంచి దాదాపు 2వేల డాలర్ల నగదును దోచుకుని బందిపోట్లు పరారైనట్లు తెలిపారు. ఈ ఘటనకు కొద్ది గంటల ముందు ఓ మిలిటరీ వాహనంపై కూడా బందిపోట్లు దాడిచేసినట్లు అధికారులు వెల్లడించారు.