రియాద్: రియాద్‌లోని దక్షిణ అల్-ఫైసాలియా పరిసరాల్లో ఒక ఆసియా నివాసి నిర్వహిస్తున్న వేర్ హౌజ్ ని వాణిజ్య మంత్రిత్వ శాఖ తనిఖీ బృందాలు సీజ్ చేశాయి. అందులోంచి 33వేల నకిలీ ఉత్పత్తులను స్వాధీనం చేసుకున్నారు. ఆసియన్ నివాసితోపాటు పలువురిని అరెస్టు చేసి, వారిపై చట్టపరమైన ప్రక్రియలను పూర్తి చేయడానికి పబ్లిక్ ప్రాసిక్యూషన్‌కు రిఫర్ చేశారు. ఈ మేరకు జకాత్, పన్ను, కస్టమ్స్ అథారిటీ వెల్లడించింది. సౌదీ అథారిటీ ఫర్ ఇంటెలెక్చువల్ ప్రాపర్టీ , సెక్యూరిటీ ఏజెన్సీల సహకారంతో సంయుక్తంగా తనిఖీలు చేపట్టినట్టు తెలిపింది. 

స్వాధీనం చేసుకున్న నకిలీ వస్తువులలో 33,459 దుప్పట్లు, 28వేల బ్యాగులు, నకిలీకి ఉపయోగించే ప్రింటెడ్ మెటీరియల్స్ ఉన్నాయి. యాంటీ-కవర్-అప్ చట్టం,  యాంటీ-కమర్షియల్ ఫ్రాడ్ చట్టంలోని నిబంధనల ప్రకారం.. నేరం రుజువైతే నిందితులకు ఐదు సంవత్సరాల వరకు జైలు శిక్ష, SR5 మిలియన్ల వరకు జరిమానా విధించే అవకాశం ఉంది.