తన 101 చిత్రాన్ని రైతు నేపథ్యం ఉన్న కథతో చేస్తానని సినీనటుడు, హిందూపురం ఎమ్మెల్యే నందమూరి బాలకృష్ణ తెలిపారు. అనంతపురం జిల్లా హిందూపురం నియోజకవర్గంలోని దేవనహళ్లి గ్రామంలో మంగళవారం ఆయన పర్యటించారు. గ్రామానికి వచ్చిన బాలకృష్ణకు ప్రజలు ఘనస్వాగతం పలికారు. ముందుగా ఆయన గ్రామంలో సీసీ రోడ్డు నిర్మాణానికి భూమిపూజ చేశారు. అనంతరం రైతులకు రుణమాఫీ పత్రాలు అందజేశారు. ఈ సందర్భంగా బాలకృష్ణ మాట్లాడుతూ రాష్ట్రం ఆర్థికలోటుతో ఉన్నప్పటికీ ఇచ్చిన మాట ప్రకారం రుణమాఫీ చేస్తున్నట్లు తెలిపారు. అర్హులైన వారందరికీ రుణమాఫీ చేస్తామన్నారు. తనకు రైతులంటే ఎనలేని గౌరవమని... అందుకే తన 101 చిత్రాన్ని రైతు నేపథ్యం ఉన్న కథతో తీస్తానని చెప్పారు.