తెల్లని పొడవాటి దుస్తులు.. తలపై స్కార్ఫ్‌.. ఆపైన నల్లటి బ్యాండ్‌.. ఇవన్నీ వినగానే మనకు గుర్తొచ్చేది దుబాయ్  షేక్‌లే కదా. ప్రత్యేక వస్త్రధారణతో వారంతా ఏ ప్రదేశానికి వెళ్లినా.. యునైటెడ్‌ అరబ్‌ ఎమిరేట్స్‌ ప్రజలని ఇట్టే గుర్తుపట్టొచ్చు. అయితే తమ దేశంలో అయితే సరేగానీ.. విదేశాలకు వెళ్లినప్పుడు మాత్రం ఆ దుస్తులను వేసుకోవద్దని విజ్ఞప్తి చేస్తున్నారట ఎమిరేట్స్‌ అధికారులు. ఇటీవల అలాంటి వస్త్రధారణ ఉన్న ఓ వ్యక్తిని అమెరికాలో ఇస్లామిక్‌ స్టేట్‌ ఉగ్రవాదిగా అనుమానించడంతో వారు ఈ నిర్ణయం తీసుకున్నారట. అసలేం జరిగిందంటే..

ఎమిరేట్స్‌కు చెందిన ఓ వ్యాపారవేత్తను ఇటీవల అమెరికాలోని ఒహియో లో పోలీసులు అదుపులోకి తీసుకున్నారు. ఆయన వెళ్లిన ఓ హోటల్‌లోని క్లర్క్‌ అతడి వేషధారణ, భాషను చూసి ఉగ్రవాది అని అనుమానించింది. దీంతో ఆమె అత్యవసర నంబర్‌కు కాల్‌ చేయడంతో.. పోలీసులు అతడిని అదుపులోకి తీసుకొని విచారించగా.. ఆయన ఓ వ్యాపారవేత్త అని తెలిసింది. ఈ ఘటన అనంతరం ఎమిరేట్స్‌ విదేశాంగ శాఖ ప్రజలకు కొన్ని సూచనలు చేసింది.
విదేశాలకు వెళ్లినప్పుడు ఆయా దేశాల చట్టాలను గౌరవించాలని.. అందుకోసం.. తమ వస్త్రధారణను పక్కన బెడితే తప్పేమీ లేదని తమ వెబ్‌సైట్లో చెప్పుకొచ్చింది.