జనరల్‌ డిపార్ట్‌మెంట్‌ ఆఫ్‌ ట్రాఫిక్‌ అధికార ప్రతినిథి కల్నల్‌ తరీక్‌ అల్‌ ఆర్‌బీన్‌ మాట్లాడుతూ, డ్రైవింగ్‌ టీచర్లుగా అవతారమెత్తిన కొందరు అక్రమార్కులు సౌదీ మహిళల్ని వంచిస్తున్నట్లుగా తమ దృష్టికి వచ్చిందని అలాంటి వారి పట్ల అప్రమత్తంగా ఉండాలని హెచ్చరించారు. అధికారికంగా డ్రైవింగ్‌ నేర్పించే కేంద్రాలను త్వరలో ప్రకటిస్తామనీ, ఈలోగా తొందరపడి అక్రమార్కుల వలలో పడవద్దని ఆయన సూచించడం జరిగింది. ఈస్టర్న్‌ ప్రావిన్స్‌లోని కొన్ని ఆఫీసులతోపాటు, మరికొంతమంది మహిళలకు డ్రైవింగ్‌ నేర్పుతామంటూ ముందుకొస్తున్న విషయం తమ దృష్టికి వచ్చిందని చెప్పారాయన. మినిస్టీరియల్‌ కమిటీ సంబంధిత రెగ్యులేషన్స్‌ పూర్తి చేయగానే, నెలరోజుల్లోపు అధికారిక ట్రైనింగ్‌ కేంద్రాల్ని ఏర్పాటు చేస్తామని తెలిపారాయన. ఎలాంటి అనుమతి లేకుండా ఎవరైనా మహిళలకు డ్రైవింగ్‌ ఇస్తున్నట్లు తమ దృష్టికి వచ్చినట్లయితే వారికి కఠినంగా జరీమానాలు విధిస్తామని అల్‌ అర్‌బీన్‌ స్పష్టం చేశారు.