హైదరాబాద్: తెలుగు బుల్లితెర పై అత్యంత ప్రజాదరణ పొందిన రియాలిటీ షో ‘బిగ్‌బాస్‘ (Bigg Boss 9) మళ్లీ కొత్త ఉత్సాహంతో, కొత్త కాన్సెప్ట్‌తో ప్రేక్షకుల ముందుకు రానుంది. ఇప్పటికే ఎనిమిది విజయవంతమైన సీజన్లు పూర్తి చేసుకున్న ఈ రియాలిటీ షో, తొమ్మిదో సీజన్ కోసం రంగం సిద్ధం చేసుకుంది. గత సీజన్ల మాదిరిగానే కింగ్ నాగార్జున ఈ సీజన్‌కు వ్యాఖ్యాతగా కొనసాగనుండటమే కాకుండా, ఈసారి సామాన్యులు కూడా హౌస్‌లోకి అడుగు పెట్టే అవకాశం కల్పించబడుతున్నది అన్న వార్త షోపై అంచనాలను రెట్టింపు చేసింది.

ఈసారి “రియాలిటీ” నిజంగానే రియలైజ్ అవుతోంది
బిగ్‌బాస్ సాధారణంగా సెలబ్రిటీలు మాత్రమే పాల్గొనే ఓ ప్రత్యేక వేదికగా గుర్తింపు పొందింది. కింగ్ నాగార్జున మరోసారి వ్యాఖ్యాతగా వ్యవహరించనున్న ఈ సీజన్‌కు ‘చదరంగం కాదు.. ఈసారి రణరంగం’ అనే ఆసక్తికర ట్యాగ్‌లైన్‌ను జోడించారు. ముఖ్యంగా ఈసారి కేవలం సెలబ్రిటీలకే కాకుండా, సామాన్య ప్రజలకు కూడా బిగ్‌బాస్ హౌస్‌లోకి అడుగుపెట్టే అవకాశాన్ని కల్పిస్తున్నట్టు ప్రకటించి షోపై అంచనాలను పెంచారు.

నాగార్జున ప్రోమోతో సమాజానికి సందేశం
తాజాగా విడుదల చేసిన ప్రోమోలో నాగార్జున ఈ కీలక ప్రకటన చేశారు. ‘‘ఇన్నాళ్లుగా మీరు బిగ్‌బాస్ షోను ఎంతో ఆదరించారు. ఇంత ప్రేమను పంచిన మీకు బదులుగా ఎలాంటి కానుక ఇవ్వాలి? మీరు ఎంతగానో ఇష్టపడే బిగ్‌బాస్ హౌస్‌లోకి ప్రవేశించే అవకాశమే మీకు మేమిచ్చే రిటర్న్ గిఫ్ట్. ఈసారి హౌస్‌లోకి సెలబ్రిటీలతో పాటు మీలో ఒకరికి కూడా చోటు ఉంటుంది. బిగ్‌బాస్ 9 తలుపులు మీకోసం తెరిచే ఉన్నాయి, వచ్చేయండి’’ అంటూ సామాన్యులను షోలోకి ఆహ్వానించారు.

ఎలా అప్లై చేయాలి?
ఈ ఛాన్స్‌ను ఉపయోగించుకోవాలనుకునే అభ్యర్థులు వారు bb9.jiostar.com వెబ్‌సైట్‌లో తమ వివరాలు నమోదు చేసుకుని, బిగ్‌బాస్ హౌస్‌లోకి ఎందుకు వెళ్లాలనుకుంటున్నారో వివరిస్తూ ఒక వీడియోను అప్‌లోడ్ చేయాల్సి ఉంటుందని జియో హాట్‌స్టార్ నిర్వాహకులు తెలిపారు. నిబంధనల మేరకు ఎంపికైన వారికి హౌస్‌మేట్‌గా మారే అవకాశం లభిస్తుంది.

వదంతులకు ముగింపు!
కొన్ని రోజులుగా, ఈ సీజన్‌కు వ్యాఖ్యాతగా ఎవరు వ్యవహరిస్తారనే దానిపై సోషల్ మీడియాలో పెద్ద ఎత్తున చర్చ జరిగింది. ఈసారి నాగార్జున స్థానంలో నందమూరి బాలకృష్ణ హోస్ట్‌గా వస్తారంటూ ఊహాగానాలు వ్యాపించాయి. అయితే, తాజా ప్రోమోలో నాగార్జునే కనిపించి, కొత్త సీజన్‌ను ప్రకటించడంతో ఆ వదంతులకు తెరపడినట్టయింది. ‘ఆటలో అలుపు వచ్చినంత తేలిగ్గా గెలుపు దక్కదు. గెలవాలంటే యుద్ధం చేస్తే చాలదు, ప్రభంజనం సృష్టించాలి’ అంటూ నాగార్జున చెప్పిన డైలాగ్‌లు షోపై ఆసక్తిని మరింత పెంచుతున్నాయి.

కంటెస్టెంట్ల ఎంపిక వేగంగా కొనసాగుతోంది
ప్రస్తుతం కంటెస్టెంట్ల ఎంపిక ప్రక్రియ వేగంగా జరుగుతోంది. ఇప్పటికే పలువురు సినీ, టీవీ నటులతో పాటు సోషల్ మీడియాలో ప్రాచుర్యం పొందిన ఇన్‌ఫ్లూయెన్సర్లను నిర్వాహకులు సంప్రదించినట్టు తెలుస్తోంది. ఒప్పందాలు, ఇతర వడపోతల ప్రక్రియలు పూర్తయ్యాక ఫైనల్ కంటెస్టెంట్ల వివరాలు వెల్లడయ్యే అవకాశం ఉంది. గత సీజన్లలో ఒకటి, రెండుసార్లు సామాన్యులకు అవకాశం ఇచ్చినా, ఈసారి అధికారికంగా ప్రకటన విడుదల చేసి ఆహ్వానించడంతో ఈ సీజన్ మరింత రసవత్తరంగా సాగడం ఖాయమని ప్రేక్షకులు భావిస్తున్నారు.