యూఏఈః దోహాలో హమాస్‌ను లక్ష్యంగా చేసుకుని ఇజ్రాయెల్ దాడులకు తెగబడటాన్ని గల్ఫ్ దేశాలు ముక్త కంఠంతో ఖండించాయి. ఇది ఖతార్ రాష్ట్ర సార్వభౌమత్వాన్ని స్పష్టంగా ఉల్లంఘించడమేనని పేర్కొన్నాయి. అంతర్జాతీయ చట్టాలు, ఐక్యరాజ్యసమితి చార్టర్‌పై జరిగిన దాడిగా అభిర్ణించాయి.  
సౌదీ అరేబియా ఇజ్రాయెల్ వి దురాక్రమణ చర్యగా పేర్కొంది. ఖతార్ తీసుకునే అన్ని చర్యలకు పూర్తి మద్దతు ఇస్తామని తెలిపింది. ఖతార్ సార్వభౌమత్వంపై జరిగిన దాడిగా ఒమన్ తెలిపింది.  
ఇజ్రాయెల్ దాడులు అంతర్జాతీయ శాంతిని నేరుగా దెబ్బతీస్తాయని, ఈ ప్రాంతంలో సార్వభౌమత్వాన్ని గౌరవించాలని కువైట్ పేర్కొంది. ఇజ్రాయెల్ ది పిరికి చర్యగా పేర్కొన్న జోర్డాన్..దాడులను తప్పుబట్టింది. ఖతార్ కు అండగా ఉంటామని, తదుపరి తీసుకునే చర్యలకు ఒకటి నిలిచి మద్దతు ఇస్తామని గల్ఫ్ సహకార మండలి  సభ్య దేశాలు తేల్చిచెప్పాయి.