రియాద్:  సెహహతి అప్లికేషన్ ద్వారా సీజనల్ ఇన్‌ఫ్లుఎంజా వ్యాక్సిన్‌ను ఇప్పుడు అపాయింట్ మెంట్ బుక్ చేసుకోవచ్చని సౌదీ ఆరోగ్య మంత్రిత్వ శాఖ ప్రకటించింది.ఈ వ్యాక్సిన్ ఇన్ఫెక్షన్ల తీవ్రతను సమర్థవంతంగా తగ్గిస్తుందన్నారు. దాంతో ఇంటెన్సివ్ కేర్ అవసరాన్ని తగ్గిస్తుందని డాక్టర్లు వెల్లడించారు. దాంతోపాటు సీజనల్ ఇన్‌ఫ్లుఎంజాతో సంబంధం ఉన్న మరణాల రేటును గణనీయంగా తగ్గిస్తుందన్నారు.

ఇక దీర్ఘకాలిక వ్యాధులు ఉన్న వ్యక్తులు, రోగనిరోధక శక్తిని తగ్గించే మందులు తీసుకుంటున్నవారు, 50 ఏళ్లు పైబడిన వ్యక్తులు, ఆరు నెలల నుండి ఐదు సంవత్సరాల వయస్సు ఉన్న పిల్లలు, గర్భిణీ స్త్రీలు, ఒబెసిటీ ఉన్న వ్యక్తులు మరియు హెల్త్ కేర్ వర్కర్స్ వంటి వారు తప్పనిసరిగా వ్యాక్సిన్ తీసుకోవాలని మంత్రిత్వ శాఖ కోరింది.

గత సంవత్సరం డేటా ప్రకారం, ఇంటెన్సివ్ కేర్ యూనిట్లలో చేరిన రోగులలో 96 శాతం మందికి ఇంకా వ్యాక్సిన్ అందలేదని వెల్లడించారు.