లండన్: లండన్ పర్యటనలో ఉన్న ఆంధ్రప్రదేశ్ ముఖ్యమంత్రి ఎన్. చంద్రబాబు నాయుడుకు హిందూజా గ్రూప్ నుంచి పెద్ద పెట్టుబడి ప్రతిపాదన లభించింది.ఆ గ్రూప్ ప్రతినిధులతో జరిగిన సమావేశంలో రాష్ట్ర అభివృద్ధి, శక్తి రంగ విస్తరణ, గ్రీన్ ఎనర్జీ ప్రాజెక్టులపై విస్తృత చర్చలు జరిగాయి. చర్చల అనంతరం హిందూజా గ్రూప్ రాష్ట్రంలో రూ.20 వేల కోట్ల భారీ పెట్టుబడికి అంగీకరించింది.

ఈ ఒప్పందం ప్రకారం, హిందూజా సంస్థ ప్రస్తుతం విశాఖపట్నంలో ఉన్న పవర్ ప్లాంట్ సామర్థ్యాన్ని 1,600 మెగావాట్లు పెంచే ప్రణాళికను సిద్ధం చేసింది. దీని ద్వారా రాష్ట్రంలో విద్యుత్ ఉత్పత్తి సామర్థ్యం మరింతగా పెరుగనుంది.

రాయలసీమలో సౌర–పవన విద్యుత్ ప్రాజెక్టులు
హిందూజా గ్రూప్, రాయలసీమ ప్రాంతంలో సౌర మరియు పవన విద్యుత్ ఉత్పత్తి యూనిట్ల స్థాపనకు కూడా ముందుకొచ్చింది. ఈ ప్రాజెక్టులు రాష్ట్రం గ్రీన్ ఎనర్జీ ఉత్పత్తిలో ఆత్మనిర్భరత సాధించడంలో కీలక పాత్ర పోషిస్తాయి. రాష్ట్ర ప్రభుత్వం అందిస్తున్న పరిశ్రమలకు అనుకూల విధానాలు, మౌలిక సదుపాయాల లభ్యత హిందూజా సంస్థను ఆకర్షించినట్లు తెలుస్తోంది. ఈ ప్రాజెక్టులు పూర్తి స్థాయిలో అమలు అయితే, ఉద్యోగావకాశాలు, విద్యుత్ సరఫరా స్థిరత్వం, పారిశ్రామిక వృద్ధి వంటి అనేక అంశాల్లో పాజిటివ్ ప్రభావం పడుతుంది.

ఎలక్ట్రిక్ వాహన ఛార్జింగ్ నెట్వర్క్‌పై ఒప్పందం
ప్రస్తుత ట్రెండ్‌ను దృష్టిలో ఉంచుకుని, హిందూజా గ్రూప్ రాష్ట్రవ్యాప్తంగా ఎలక్ట్రిక్ వాహన ఛార్జింగ్ స్టేషన్ల విస్తృత నెట్వర్క్ ఏర్పాటుకు కూడా ముందుకొచ్చింది. ఈ ప్రాజెక్ట్‌పై ప్రభుత్వం మరియు హిందూజా సంస్థ మధ్య MoU(Memorandum of Understanding) కుదిరింది. దీని ద్వారా ఎలక్ట్రిక్ వాహనాల వినియోగం పెరగడమే కాకుండా, కాలుష్యం తగ్గి పర్యావరణ పరిరక్షణకు సహకారం లభిస్తుంది.