జెడ్డా:  ఇథియోపియాలోని హైలే గోబీ అగ్నిపర్వతం విస్ఫోటనం చెందింది. దీని నుంచి భారీ స్థాయిలో బూడిద వెలువడుతోంది. కాగా, ఈ బూడిద కారణంగా సౌదీ అరేబియా వాతావరణం ప్రభావితం కాలేదని నేషనల్ సెంటర్ ఫర్ మెటియోరాలజీ (NCM) తెలిపింది.

అధునాతన జాతీయ వ్యవస్థలను ఉపయోగించి కేంద్రం 24 గంటలూ బూడిద మేఘాల కదలికను పర్యవేక్షిస్తోందని NCM ప్రతినిధి హుస్సేన్ అల్-ఖహ్తానీ అన్నారు.  అయితే, వాతావరణ పరిస్థితులు ప్రభావితమైతే అవసరమైన చర్యలు తీసుకుంటామని, పరిస్థితికి అనుగుణంగా కేంద్రం హెచ్చరికలు లేదా అప్డేట్ లను జారీ చేస్తూనే ఉంటుందని అల్-ఖహ్తానీ తెలిపారు.

హైలే గోబీ అగ్నిపర్వతం విస్ఫోటనం ఆదివారం ఉదయం ప్రారంభమైంది. ఈ అగ్నిపర్వతం ఇథియోపియాలోని అఫర్ ప్రాంతంలో గ్రేట్ రిఫ్ట్ వ్యాలీలో ఉంది. ఇది వేల సంవత్సరాలుగా నిద్రాణంగా ఉంది. 10 కిలోమీటర్ల కంటే ఎక్కువ ఎత్తులో ఆకాశంలోకి దట్టమైన బూడిద మేఘాలు ఏర్పడినట్లు ఉపగ్రహ చిత్రాలు ద్వారా తెలుస్తోంది.