హైదరాబాద్: హైదరాబాద్‌లోని ఉప్పల్‌ స్టేడియంలో అర్జెంటీనా ఫుట్‌బాల్‌ దిగ్గజం లియోనెల్‌ మెస్సీ-తెలంగాణ ముఖ్యమంత్రి రేవంత్‌ రెడ్డి జట్ల మధ్య ఇవాళ ఫ్రెండ్లీ ఫుట్‌బాల్‌ మ్యాచ్ జరిగింది.

మెస్సీ హైదరాబాద్‌ పర్యటన సందర్భంగా నిర్వహించిన ఈ మ్యాచ్‌లో మెస్సీ టీమ్‌పై సింగరేణి ఆర్‌ఆర్‌ టీమ్‌ 3-0 గోల్స్‌తో గెలిచింది. ఆర్‌ఆర్‌ టీమ్ తరఫున సీఎం రేవంత్‌రెడ్డి ఆడి ఓ గోల్‌ కొట్టారు. ఇందులో మెస్సీ, రేవంత్ రెడ్డి ఆడింది 5 నిమిషాలపాటే. 

అనంతరం, ఇరు జట్లకు మెస్సీ పతకాలు అందజేశారు. ఇక్కడకు వచ్చి తెలుగు వారిని కలవడం సంతోషంగా ఉందని అన్నారు. ఇక్కడి వారు చూపించిన అభిమానం ఎంతో శక్తినిచ్చిందని చెప్పారు.

కాగా, మ్యాచ్‌కి ముందు ఇరు టీమ్‌లతో మెస్సీ, రేవంత్‌ రెడ్డి ఫొటోలు దిగారు. ఈ మ్యాచ్‌ను రాహుల్‌ గాంధీ కూడా చూశారు. అలాగే, ప్రియాంక గాంధీ కుమారుడు, కుమార్తె కూడా స్టేడియానికి వచ్చారు.