నఖల్: దక్షిణ అల్ బతినా గవర్నరేట్‌లోని నఖల్ విలాయత్‌లో ఉన్న వకాన్ విలేజ్ కు విజిటర్స్ పోటెత్తారు. 2025లో 39,976 మంది సందర్శించారు. ఇక్కడ వ్యవసాయ పొలాలు, పురాతన పర్వత మార్గాలలో ప్రయాణించడం వంటి విభిన్న అనుభవాలను విజిటర్స్ కు అందిస్తుంది. ఈ ప్రత్యేక కారణంగా ఇది ప్రపంచవ్యాప్తంగా ఉన్న సాహసయాత్రికులకు ఒక గమ్యస్థానంగా మారిందని దక్షిణ అల్ బతినా గవర్నరేట్‌లోని హెరిటేజ్ మరియు టూరిజం విభాగం డైరెక్టర్ డాక్టర్ అల్ ముతాసిమ్ నాజర్ అల్ హిలాలీ తెలిపారు. 

ముఖ్యంగా వింటర్ చివరిలో (జనవరి మరియు ఫిబ్రవరి మధ్య) ప్రారంభమయ్యే ఆప్రికాట్ మరియు ప్లం పూల వికసించే కాలాన్ని చూడటానికి పర్యాటకులు అధికంగా వస్తారని వెల్లడించారు.  అలాగే, అధికారిక సెలవులు మరియు వారాంతాల్లో గ్రామానికి సందర్శకుల తాకిడి అధికంగా ఉంటుందని తెలిపారు. త్వరలోనే మరిన్ని ప్రత్యేక ఆకర్షణలు అందుబాటులో రానున్నాయని,  దాంతో పర్యాటకుల సంఖ్య మరింత పెరిగే అవకాశం ఉందని పేర్కొన్నారు.