న్యూ ఢిల్లీ: న్యూఢిల్లీలో నిర్వహించిన ఇండియా ఏఐ ఇంపాక్ట్ సమ్మిట్ దేశ చరిత్రలో కీలక మైలురాయిగా నిలిచింది.ఈ సదస్సు ద్వారా భారత ఆర్టిఫిషియల్ ఇంటెలిజెన్స్ రంగానికి భారీ స్థాయిలో పెట్టుబడులు రావడంతో పాటు, గ్లోబల్ టెక్ రంగంలో భారత్ స్థానం మరింత బలపడింది. కేంద్ర ఐటీ శాఖ మంత్రి అశ్వినీ వైష్ణవ్ మాట్లాడుతూ, భారత్ ప్రపంచవ్యాప్తంగా ప్రధాన ఏఐ హబ్‌గా ఎదుగుతోందని ఆశాభావం వ్యక్తం చేశారు.

ఈ సమ్మిట్‌లో మౌలిక సదుపాయాల అభివృద్ధికి వివిధ దేశాల నుంచి 250 బిలియన్ డాలర్లకు పైగా పెట్టుబడి ప్రతిపాదనలు వచ్చినట్లు వెల్లడించారు. అదనంగా, డీప్ టెక్ రంగంలో మరో 20 బిలియన్ డాలర్ల పెట్టుబడులకు కంపెనీలు ఆసక్తి చూపాయి. ఈ పెట్టుబడులు భారత ఏఐ ఎకోసిస్టమ్‌ను మరింత వేగంగా అభివృద్ధి చేసే అవకాశముందని నిపుణులు అంటున్నారు.

ఏఐ వినియోగంపై రూపొందించిన ‘ఢిల్లీ డిక్లరేషన్’కు ఇప్పటికే 70 దేశాలు మద్దతు ప్రకటించాయి. శనివారం నాటికి ఈ సంఖ్య 80కి చేరే అవకాశం ఉందని అధికారులు అంచనా వేస్తున్నారు. ఇది గ్లోబల్ ఏఐ పాలసీ రూపకల్పనలో భారత్ కీలక పాత్ర పోషిస్తున్నట్లు సూచిస్తోంది. ఐదు రోజుల పాటు జరిగిన ఈ సమ్మిట్‌ను సుమారు 5 లక్షల మందికి పైగా సందర్శించినట్లు మంత్రి తెలిపారు. భారత్‌లోని ఏఐ ప్రతిభను ప్రపంచం గుర్తించిందని, యువతకు ఈ రంగంలో అపార అవకాశాలు ఉన్నాయని ఆయన పేర్కొన్నారు.

ప్రభుత్వం త్వరలో ప్రారంభించనున్న ఇండియా ఏఐ మిషన్ 2.0 ద్వారా యువతకు భారీ అవకాశాలు కల్పించనున్నారు. ఈ మిషన్ కింద సుమారు 20 లక్షల మందికి ఏఐ టెక్నాలజీలో ప్రత్యేక శిక్షణ ఇవ్వాలని లక్ష్యంగా పెట్టుకున్నారు. ప్రస్తుతం ఉన్న 38,000 జీపీయూలకు అదనంగా మరో 20,000 జీపీయూలను అందుబాటులోకి తీసుకువచ్చి కంప్యూటింగ్ సామర్థ్యాన్ని పెంచాలని ప్రభుత్వం ప్రణాళికలు రూపొందిస్తోంది.