భారతీయ శాస్త్రీయ నృత్య రంగంలో విషాదం నెలకొంది. ప్రముఖ ఒడిస్సీ నృత్యకారిణి మధుమిత రౌత్ (59) శనివారం తుదిశ్వాస విడిచారు. గత కొంతకాలంగా అనారోగ్యంతో బాధపడుతున్న ఆమె, గుండెపోటు రావడంతో ఢిల్లీలోని ఒక ప్రైవేట్ ఆస్పత్రిలో చికిత్స పొందుతూ కన్నుమూశారు.

మధుమిత రౌత్ కేవలం నృత్యకారిణి మాత్రమే కాదు, ఒడిస్సీ నృత్య పునరుద్ధరణలో కీలక పాత్ర పోషించిన లెజెండరీ గురువు మాయాధర్ రౌత్ కుమార్తె. 1950వ దశకంలో శాస్త్రీయ పరిజ్ఞానంతో ఒడిస్సీ నృత్యాన్ని తిరిగి వెలుగులోకి తెచ్చిన తన తండ్రి అడుగుజాడల్లో నడిచి, ఆ కళకు అంతర్జాతీయ స్థాయిలో గుర్తింపు తీసుకువచ్చారు.

కళా ప్రస్థానం–పురస్కారాలు
దేశ విదేశాల్లో ప్రదర్శనలు: నెదర్లాండ్స్, జర్మనీ, అమెరికా వంటి అనేక దేశాల్లో ఒడిస్సీ నృత్య ప్రదర్శనలు ఇచ్చి భారతీయ సంస్కృతిని చాటిచెప్పారు.
బోధన: తన తండ్రి స్థాపించిన ‘మాయాధర్ రౌత్ స్కూల్ ఆఫ్ ఒడిస్సీ డాన్స్’ ద్వారా ఎంతోమంది శిష్యులను తీర్చిదిద్దారు.
పురస్కారాలు: నృత్య రంగంలో ఆమె చేసిన విశేష కృషికి గానూ ఒడిశా స్టేట్ సంగీత నాటక అకాడమీ అవార్డుతో పాటు అనేక ప్రతిష్టాత్మక పురస్కారాలను అందుకున్నారు.