పశ్చిమాసియాలో ఉద్రిక్తతలు తారాస్థాయికి చేరాయి. ఇరాన్ చేపట్టిన ప్రతీకార దాడుల వల్ల అమెరికా సైన్యం ఊహించని రీతిలో భారీ ఆర్థిక నష్టాన్ని చవిచూసింది. యుద్ధం ప్రారంభమైన కేవలం మొదటి రెండు వారాల్లోనే గల్ఫ్ రీజియన్‌లోని అమెరికా సైనిక స్థావరాలపై జరిగిన దాడుల కారణంగా సుమారు 800 మిలియన్ డాలర్ల (సుమారు రూ. 6,700 కోట్లు) నష్టం వాటిల్లినట్లు అంతర్జాతీయ మీడియా సంస్థ బీబీసీ (BBC) మరియు సెంటర్ ఫర్ స్ట్రాటజిక్ అండ్ ఇంటర్నేషనల్ స్టడీస్ (CSIS) తమ నివేదికల్లో వెల్లడించాయి.

ఈ దాడుల్లో అత్యధిక నష్టం జోర్డాన్‌లోని అమెరికా సైనిక బేస్‌కు వాటిల్లింది. ఇక్కడ అత్యాధునికమైన రాడార్ వ్యవస్థ లక్ష్యంగా ఇరాన్ దాడులు చేయడంతో, అది తీవ్రంగా దెబ్బతిన్నట్లు సమాచారం. ఈ ఒక్క రాడార్ వ్యవస్థ విలువే దాదాపు 485 మిలియన్ డాలర్లు ఉంటుందని అంచనా వేస్తున్నారు. అమెరికా రక్షణ వ్యవస్థలో కీలకమైన ఈ పరికరాలు ధ్వంసం కావడం ఆ దేశానికి పెద్ద ఎదురుదెబ్బగా మారింది.

జోర్డాన్‌తో పాటు కువైట్, ఖతార్ మరియు సౌదీ అరేబియాలోని అమెరికా నియంత్రణలో ఉన్న విమానాశ్రయాలు, అత్యంత శక్తివంతమైన కమ్యూనికేషన్ వ్యవస్థలపైన కూడా దాడులు జరిగాయి. ఈ ప్రాంతాల్లో సుమారు 310 మిలియన్ డాలర్ల మేర ఆస్తి నష్టం సంభవించినట్లు నివేదికలు పేర్కొన్నాయి. పశ్చిమాసియాలో అమెరికా వ్యూహాత్మక స్థావరాలను దెబ్బతీయడం ద్వారా ఇరాన్ తన పట్టును నిరూపించుకునే ప్రయత్నం చేస్తోంది. ఈ పరిణామాలు గల్ఫ్ ప్రాంతంలో భవిష్యత్తులో మరిన్ని సంక్షోభాలకు దారితీసేలా కనిపిస్తున్నాయి