మనామా: బహ్రెయిన్‌లోని అతిపెద్ద మసీదు అల్-ఫతే గ్రాండ్ మసీదు.  ఇస్లామిక్ వాస్తుశిల్పానికి అత్యద్భుతమైన ఉదాహరణలలో ఒకటిగా నిలుస్తుంది. ప్రపంచవ్యాప్తంగా ఉన్న సందర్శకులను ఇది స్వాగతం పలుకుతోంది. ఏటా వేలాది మంది పర్యాటకులు దీనిని సందర్శిస్తారు.

ఈ మసీదు సందర్శన ముస్లింలకు మరియు ముస్లిమేతరులకు గొప్ప సాంస్కృతిక మరియు ఆధ్యాత్మిక అనుభవాన్ని అందిస్తుంది. అహ్మద్ అల్-ఫతే గౌరవార్థం నిర్మించిన ఈ మసీదు మనామా నగర నడిబొడ్డున ఉంటుంది.  ఇస్లాం మతం గురించి మరింత తెలుసుకోవాలనుకునే పర్యాటకుల కోసం ప్రతిరోజూ స్వాగతం పలుకుతోంది. అక్కడి గైడ్‌లు వివిధ భాషల్లో సందర్శకులకు మసీదు చరిత్ర, వాస్తుశిల్పం మరియు దాని రూపకల్పన వెనుక ఉన్న అర్థాన్ని వివరిస్తూ మార్గనిర్దేశం చేస్తారు. 

6,500 చదరపు మీటర్ల విస్తీర్ణంలో ఉన్న ఈ మసీదులో 7,000 మందికి పైగా ఒకేసారి ప్రార్థనలు చేయవచ్చు. ఇందులో పురుషులు మరియు మహిళలకు వేర్వేరు ప్రార్థనా స్థలాలు ఉన్నాయి. దీంతోపాటు ఒక గ్రంథాలయం, ఒక ఇస్లామిక్ సంస్థ, ఖురాన్ నేర్పించే పాఠశాల ఉన్నాయి. విశాలమైన ప్రాంగణం పైన ఒక అద్భుతమైన ఫైబర్‌గ్లాస్ గోపురం ఉంది. ఇది ప్రపంచంలోనే అతిపెద్ద ఫైబర్‌గ్లాస్ గోపురాల్లో ఒకటిగా గుర్తింపు పొందింది.

ఇక మసీదు లోపల  విలాసవంతమైన షాండిలియర్లు పైకప్పు నుండి వేలాడుతూ అందగా కనిపిస్తుంది. వంపు తిరిగిన గోడలు, టేకు చెక్క తలుపులు, అద్భుతమైన అరబిక్ కూఫిక్ కాలిగ్రఫీ అందరిని ఆకట్టుకుంటాయి. వాస్తు సౌందర్యం మరియు ప్రశాంతమైన వాతావరణం ఈ మసీదును కేవలం ఒక ప్రార్థనా స్థలంగానే కాకుండా, బహ్రెయిన్‌లోని అత్యంత ముఖ్యమైన సాంస్కృతిక చిహ్నాలలో ఒకటిగా కూడా నిలుపుతుంది.