హైదరాబాద్: మల్కాజ్‌గిరిని మరింత సురక్షితమైన, పరిశుభ్రమైన నగరంగా తీర్చిదిద్దే లక్ష్యంతో పోలీస్, మున్సిపల్ శాఖల మధ్య కీలక సమన్వయ సమావేశం నిర్వహించారు. మల్కాజ్‌గిరి కమిషనర్ ఆఫ్ పోలీస్ శ్రీమతి బి. సుమతి, ఐపీఎస్ అధ్యక్షతన, మున్సిపల్ కమిషనర్ టి. వినయ్ కృష్ణా రెడ్డి, ఐఏఎస్తో ఈ సమావేశం జరిగింది.

సమావేశంలో నగరంలో రోడ్డు భద్రతను మెరుగుపరచడం, ట్రాఫిక్ సమస్యలకు శాశ్వత పరిష్కారాలు కనుగొనడం, మహిళలు, చిన్నారుల భద్రతను మరింత పటిష్ఠం చేయడం, మాదకద్రవ్యాల నిర్మూలనకు సంయుక్త చర్యలు చేపట్టడం, సీసీటీవీ కెమెరాల విస్తరణ, ప్రజలకు సమర్థవంతమైన సేవలు అందించే అంశాలపై విస్తృతంగా చర్చించారు.

పౌరుల భద్రత, సౌకర్యాలకు ప్రాధాన్యం ఇస్తూ పోలీస్, మున్సిపల్ శాఖలు పరస్పర సమన్వయంతో పనిచేయాలని సమావేశంలో నిర్ణయించారు. నగరంలో పరిశుభ్రత, ట్రాఫిక్ నిర్వహణ, నేరాల నివారణ, ప్రజా భద్రతకు సంబంధించిన కార్యక్రమాలను సంయుక్తంగా అమలు చేయడం ద్వారా మల్కాజ్‌గిరిని ఆదర్శవంతమైన నగరంగా అభివృద్ధి చేయాలని అధికారులు అభిప్రాయపడ్డారు.

ప్రజల సహకారంతో భద్రత, పరిశుభ్రత, క్రమశిక్షణకు సంబంధించిన కార్యక్రమాలను మరింత సమర్థవంతంగా అమలు చేసేందుకు రెండు శాఖలు కలిసి పనిచేయనున్నట్లు సమావేశంలో వెల్లడించారు.