దుబాయ్‌ ఇంటర్నేషనల్‌ ఎయిర్‌పోర్ట్‌లో విమానం ఎమర్జన్సీ ల్యాండింగ్‌ అయిన ఘటనలో ఓ ఫైర్‌ ఫైటర్‌ మృతి చెందినట్లు జనరల్‌ సివిల్‌ ఏవియేషన్‌ అథారిటీ ప్రకటించింది. ఈ ప్రమాదంలో చాలామందిని కాపాడే క్రమంలో ఫైర్‌ ఫైటర్‌ మృతి చెందిన ఘటన తనను తీవ్రంగా కలచివేసిందనీ, అతని ధైర్యానికి సెల్యూట్‌ చేస్తున్నామని జిసిఎఎ డైరెక్టర్‌ జనరల్‌ సైఫ్‌ అల్‌ సువ్వాది చెప్పారు. మృతుడి పేరు జసిమ్‌ అల్‌ బెలౌషిగా వెల్లడించారు. రస్‌ అల్‌ ఖైమాకి చెందిన వ్యక్తి ఈయన. అల్‌ బెలౌషి సన్నిహితుడు ఇన్‌స్ట్రాగ్రామ్‌లో స్పందిస్తూ, మనమంతా దేవుడికి చెందినవారం.. అల్‌ బెలౌషి మృతి బాధాకరం. ఆయన ఆత్మకు శాంతి కలుగుగాక అని పేర్కొన్నారు. బెలౌషి మృతి పట్ల దుబాయ్‌ రూలర్‌, యూఏఈ ప్రైమ్‌ మినిస్టర్‌, వైస్‌ ప్రెసిడెంట్‌ షేక్‌ మొహమ్మద్‌ బిన్‌ రషీద్‌ అల్‌ మక్తౌమ్‌ ప్రగాడ సానుభూతి తెలిపారు. బెలౌషి కుటుంబాన్ని అన్ని విధాలా ఆదుకుంటామని అధికారిక వర్గాలు వెల్లడించాయి.