గచ్చిబౌలిలో భారీ అగ్నిప్రమాదం: 15 బైకులు దగ్ధం

హైదరాబాద్: గచ్చిబౌలిలోని టిఎన్జీవో కాలనీలో ఉన్న ఒక అపార్ట్‌మెంట్‌ సెల్లార్‌లో ఒక్కసారిగా మంటలు చెలరేగాయి. విద్యుత్ షార్ట్ సర్క్యూట్ కారణంగా ఈ ప్రమాదం జరిగినట్లు ప్రాథమికంగా గుర్తించారు. సెల్లార్‌లో పార్క్ చేసి ఉన్న వాహనాలకు మంటలు అంటుకోవడంతో క్షణాల్లో అపార్ట్‌మెంట్ అంతా దట్టమైన పొగ కమ్మేసింది. దీంతో అక్కడ ఉన్న నివాసితులు తీవ్ర భయాందోళనకు గురయ్యారు.

ఈ ప్రమాదంలో సెల్లార్‌లో ఉన్న సుమారు 15 బైకులు పూర్తిగా కాలి బూడిదయ్యాయి. మంటల వల్ల వచ్చిన భారీ పొగ కారణంగా అపార్ట్‌మెంట్‌లో ఉన్న ఇద్దరు వ్యక్తులు ఊపిరి ఆడక తీవ్ర అస్వస్థతకు గురయ్యారు. వెంటనే స్పందించిన స్థానికులు, అగ్నిమాపక సిబ్బంది వారిని సురక్షిత ప్రాంతానికి తరలించి చికిత్స అందించారు. అదృష్టవశాత్తూ ఎటువంటి ప్రాణనష్టం జరగకపోవడంతో అందరూ ఊపిరి పీల్చుకున్నారు.

సమాచారం అందుకున్న వెంటనే అగ్నిమాపక సిబ్బంది ఘటనా స్థలానికి చేరుకుని మంటలను అదుపు చేశారు. అపార్ట్‌మెంట్ పై అంతస్తుల్లో చిక్కుకుపోయిన వారిని నిచ్చెనల సహాయంతో క్షేమంగా కిందకు దించారు. అగ్నిమాపక యంత్రాలతో నీటిని చల్లి మంటలు ఇతర ఇళ్లకు వ్యాపించకుండా అడ్డుకున్నారు. ప్రస్తుతం పరిస్థితి అదుపులో ఉందని, ఆస్తి నష్టంపై అంచనా వేస్తున్నామని పోలీసులు తెలిపారు.