దుబాయ్: డిజిటల్ ప్లాట్‌ఫార్మ్‌లు మరియు సోషల్ మీడియాలో పెరుగుతున్న నకిలీ పెట్టుబడి, ట్రేడింగ్ మోసాలపై ప్రజలను అప్రమత్తం చేస్తూ దుబాయ్ పోలీసులు హెచ్చరిక జారీ చేశారు. #BewareOfFraud ప్రచారంలో భాగంగా ఈ హెచ్చరిక విడుదలైంది.

దుబాయ్ పోలీసులు వెల్లడించిన వివరాల ప్రకారం, తక్కువ సమయంలో భారీ లాభాలు వస్తాయని హామీ ఇస్తూ మోసగాళ్లు ఆకర్షణీయ ప్రకటనలు లేదా డైరెక్ట్ మెసేజ్‌ల ద్వారా ప్రజలను వలలో వేసుకుంటున్నారు. ప్రత్యేక పెట్టుబడి అవకాశాలు, అధిక రాబడులు అందిస్తామని చెప్పి వ్యక్తులను మభ్యపెడుతున్నారు.

ఇలాంటి మోసాల్లో భాగంగా బాధితులను అత్యవసరంగా డబ్బు బదిలీ చేయమని ఒత్తిడి చేయడం, నకిలీ లింక్‌ల ద్వారా వ్యక్తిగత, బ్యాంకింగ్ వివరాలు సేకరించడం జరుగుతుందని పోలీసులు తెలిపారు. ఫలితంగా ప్రజలు ఆర్థిక నష్టాలను ఎదుర్కొంటున్నారు.

నిజమైన పెట్టుబడి సంస్థలు ఎప్పుడూ స్థిరమైన లాభాలను హామీ ఇవ్వవని, రిస్క్ లేకుండా లాభాలు వస్తాయని చెప్పవని పోలీసులు స్పష్టం చేశారు. అలాగే అధికారిక అనుమతులు లేని మార్గాల్లో డబ్బులు చెల్లించమని కోరవని తెలిపారు.

పెట్టుబడులు పెట్టే ముందు సంబంధిత యూఏఈ అధికార సంస్థల ద్వారా ఆ సంస్థ లైసెన్స్, విశ్వసనీయతను నిర్ధారించుకోవాలని ప్రజలకు సూచించారు. అనుమానాస్పద ప్రకటనలు, లింక్‌లను నివారించాలని, వ్యక్తిగత లేదా బ్యాంకింగ్ వివరాలను తెలియని వెబ్‌సైట్లలో పంచుకోకూడదని హెచ్చరించారు.

మోసాలకు సంబంధించిన అనుమానాస్పద కార్యకలాపాలను వెంటనే eCrime ప్లాట్‌ఫార్మ్ ద్వారా లేదా అధికారిక మార్గాల్లో ఫిర్యాదు చేయాలని కోరారు. అత్యవసరం కాని సందర్భాల్లో 901 నంబర్‌కు కాల్ చేయవచ్చని తెలిపారు.

ఇలాంటి నేరాలను అరికట్టడంలో ప్రజల సహకారం కీలకమని, అప్రమత్తతతో వ్యవహరించడం ద్వారా వ్యక్తిగత ఆస్తులను రక్షించుకోవచ్చని దుబాయ్ పోలీసులు పేర్కొన్నారు.