దోహా: దోహాలోని డఫ్నా ప్రాంతంలోని ఓ రెస్టారెంట్‌లో జరిగిన బహిరంగ ఘర్షణకు సంబంధించి 25 మందిని అరెస్ట్ చేసినట్లు ఖతార్ అంతర్గత వ్యవహారాల మంత్రిత్వ శాఖ (Ministry of Interior) ప్రకటించింది. ఈ ఘటనకు సంబంధించిన వీడియోలు సోషల్ మీడియాలో వైరల్ కావడంతో అధికారులు వెంటనే చర్యలు చేపట్టారు.

మంత్రిత్వ శాఖ విడుదల చేసిన ప్రకటనలో, రెస్టారెంట్‌లో జరిగిన ఈ ఘర్షణ వ్యక్తుల భద్రత, ఆస్తుల రక్షణకు ముప్పు కలిగించడంతో పాటు ప్రజా శాంతి భద్రతలను భంగం కలిగించే చర్యగా పేర్కొంది. సోషల్ మీడియాలో ప్రచారంలోకి వచ్చిన వీడియోల ఆధారంగా దర్యాప్తు చేపట్టి నిందితులను అదుపులోకి తీసుకున్నట్లు వెల్లడించింది.

వైరల్ వీడియోల్లో పలువురు వ్యక్తులు ఒకరిపై ఒకరు కుర్చీలు విసురుతూ, పెద్ద ఎత్తున వాగ్వాదం మరియు తోపులాటకు దిగిన దృశ్యాలు కనిపించాయి. కొంతమంది ఫుట్‌బాల్ జెర్సీలు ధరించి ఉన్నప్పటికీ, ఈ ఘర్షణకు ఏదైనా క్రీడా పోటీతో సంబంధం ఉందా అనే విషయాన్ని అధికారులు ఇంకా ధృవీకరించలేదు.

అరెస్టు చేసిన వ్యక్తులు వివిధ అరబ్ దేశాలకు చెందినవారని అధికారులు పేర్కొన్నప్పటికీ, వారు ఏ దేశాలకు చెందినవారో వెల్లడించలేదు. కేసును తదుపరి న్యాయపరమైన చర్యల కోసం పబ్లిక్ ప్రాసిక్యూషన్‌కు బదిలీ చేసినట్లు మంత్రిత్వ శాఖ తెలిపింది.

ఈ సందర్భంగా ఖతార్ అంతర్గత వ్యవహారాల మంత్రిత్వ శాఖ ప్రజలను దేశ చట్టాలు, నిబంధనలను గౌరవించాలని కోరింది. సమాజ భద్రత, శాంతి భద్రతలకు భంగం కలిగించే చర్యలను ఎట్టి పరిస్థితుల్లోనూ సహించబోమని, చట్టాన్ని ఉల్లంఘించిన వారిపై కఠిన చర్యలు తీసుకుంటామని హెచ్చరించింది.