దోహా: అర్హులైన కుటుంబాలకు మద్దతు ఇవ్వడం మరియు నాణ్యమైన విద్యను అందరికీ అందుబాటులోకి తీసుకురావడం లక్ష్యంగా ఖతార్‌లోని ప్రైవేట్ పాఠశాలలు మరియు కిండర్‌గార్టెన్‌ల భాగస్వామ్యంతో అమలు చేస్తున్న 'సామాజిక బాధ్యత కార్యక్రమం' (Social Responsibility Initiative) ద్వారా ఇప్పటివరకు 9వేలకు పైగా ఉచిత మరియు రాయితీ విద్యా సీట్లను కల్పించినట్లు విద్యా మరియు ఉన్నత విద్యా మంత్రిత్వ శాఖ (MoEHE) ప్రకటించింది.

ఈ కార్యక్రమం ద్వారా నిబంధనలు మరియు ప్రమాణాలకు అనుగుణంగా అర్హులైన విద్యార్థులు వివిధ విద్యా అవకాశాల నుండి ప్రయోజనం పొందేలా చేస్తున్నామని మంత్రిత్వ శాఖ తెలిపింది. అర్హులైన ఖతారీ విద్యార్థులలో ఎక్కువ మందికి ఈ కార్యక్రమ ప్రయోజనాలను విస్తరించే ప్రయత్నంలో భాగంగా.. 'మారిఫ్' (Maaref) పబ్లిక్ సర్వీసెస్ పోర్టల్ ద్వారా విద్యా వోచర్‌ల కోసం దరఖాస్తులను తిరిగి స్వీకరించడం ప్రారంభిస్తున్నట్లు కూడా మంత్రిత్వ శాఖ ప్రకటించింది. ఈ మేరకు సోషల్ మీడియా X (ట్విట్టర్) వేదికగా ప్రైవేట్ పాఠశాలల వ్యవహారాల విభాగం డైరెక్టర్ మరియు ప్రైవేట్ పాఠశాలల లైసెన్సింగ్ విభాగం తాత్కాలిక డైరెక్టర్ డాక్టర్ రానియా మహమ్మద్ ప్రకటించారు.   

ప్రస్తుతం ఈ కార్యక్రమంలో విద్యా వోచర్ విలువకు సమానమైన సుమారు 2,400 సీట్లు ఉన్నాయని డాక్టర్ మహమ్మద్ వెల్లడించారు. వోచర్ విధానంలో భాగమైన పాఠశాలల్లో తమ పిల్లలను చేర్పించే తల్లిదండ్రులు ట్యూషన్ ఫీజుకు సంబంధించిన ఎటువంటి ఖర్చులను భరించాల్సిన అవసరం లేదని వివరించారు. పాఠశాల ట్యూషన్ ఫీజులు QR 28,000 (ఖతారీ రియాల్స్) విద్యా వోచర్ విలువ కంటే ఎక్కువగా ఉన్నప్పటికీ, తల్లిదండ్రులు ఆ అదనపు మొత్తాన్ని చెల్లించాల్సిన అవసరం లేదని పేర్కొన్నారు.

ఉదాహరణకు, వార్షిక ట్యూషన్ ఫీజు QR 40,000 అయితే, వోచర్ విలువకు మరియు పాఠశాల ఫీజుకు మధ్య ఉన్న వ్యత్యాసాన్ని పాఠశాల లైసెన్స్ హోల్డర్ భరిస్తారు.  ఇది వారి సామాజిక బాధ్యత కార్యక్రమంలో భాగంగా ఉంటుందన్నారు. గతంలో, ఒక కుటుంబం వాస్తవ ఆదాయం నెలకు QR25,000 మించకూడదు. ఇప్పుడు ఆ పరిమితిని QR35,000కు పెంచారని, దీనివల్ల ఎక్కువ సంఖ్యలో కుటుంబాలు ఈ కార్యక్రమం ద్వారా ప్రయోజనం పొందగలుగుతాయని పేర్కొన్నారు.