మనామా: బహ్రెయిన్ పౌరులకు షెంజెన్ ప్రాంతానికి వీసా రహిత ప్రయాణాన్ని కల్పించడానికి జర్మనీ కృషి చేస్తోందని ప్రకటించింది.  అలాగే యూరోపియన్ యూనియన్ మరియు గల్ఫ్ సహకార మండలి (GCC) మధ్య స్వేచ్ఛా వాణిజ్య ఒప్పందంపై చర్చలను వేగవంతం చేయడానికి ప్రయత్నాలు కొనసాగుతున్నాయని బహ్రెయిన్‌లోని జర్మన్ రాయబారి హెన్నింగ్ సైమన్ తెలిపారు.

బహ్రెయిన్‌లో యూరోపియన్ యూనియన్ స్థానిక అధ్యక్ష పదవిని సైప్రస్ నుండి జర్మనీకి అప్పగించే కార్యక్రమంలో ఆయన పాల్గొన్నారు. యూరోపియన్ యూనియన్ కౌన్సిల్ అధ్యక్షతలో జర్మనీ కొనసాగే సమయంలో GCCతో EU వ్యూహాత్మక భాగస్వామ్యాన్ని బలోపేతం చేయడం తమ ప్రధాన ప్రాధాన్యతగా ఉంటుందని సైమన్ అన్నారు.

బహ్రెయిన్ పౌరులకు షెంజెన్ వీసా నిబంధనల నుండి మినహాయింపు ఇచ్చే ప్రయత్నాలను ముందుకు తీసుకెళ్లడం మరియు EU-GCC స్వేచ్ఛా వాణిజ్య ఒప్పందంపై చర్చలను వేగవంతంగా పూర్తి చేయడం వంటివి తమ ప్రాధాన్యతల్లో ప్రథమ వరుసలో ఉన్నాయని పేర్కొన్నారు. వాణిజ్య చర్చల్లో  పురోగతి ఉందని,  వచ్చే ఏడాది ఈ ఒప్పందంపై సంతకాలు జరగవచ్చని ఆయన ఆశాభావం వ్యక్తం చేశారు. అక్టోబర్‌లో రియాద్‌లో జరగనున్న GCC-యూరోపియన్ శిఖరాగ్ర సమావేశానికి సన్నాహాలు జరుగుతున్నాయని సైమన్ వెల్లడించారు. ప్రాంతీయ భద్రత, ఇంధనం, పెట్టుబడులు, ఆర్థిక సహకారం మరియు ప్రపంచ సవాళ్లతో సహా పరస్పర ఆసక్తి ఉన్న అంశాలపై ఈ సమావేశంలో చర్చిస్తారని ఆయన తెలిపారు.