జెడ్డా: సౌదీ అరేబియా క్రౌన్ ప్రిన్స్, ప్రధాని మహ్మద్ బిన్ సల్మాన్.. స్పెయిన్ ప్రధాని పెడ్రో సాంచెజ్ తో టెలిఫోన్‌లో మాట్లాడారు. ఈ సందర్భంగా ఇరు దేశాల ద్వైపాక్షిక సంబంధాలు, ప్రాంతీయ తాజా పరిణామాలపై విస్తృతంగా చర్చించారు.

సౌదీ అరేబియా–స్పెయిన్ మధ్య వివిధ రంగాల్లో కొనసాగుతున్న సహకారాన్ని సమీక్షించిన ఇద్దరు నేతలు.. పరస్పర సంబంధాలను మరింత బలోపేతం చేసే మార్గాలపై అభిప్రాయాలు పంచుకున్నారు. ఉభయ దేశాలకు సంబంధించిన పలు కీలక అంశాలపై కూడా చర్చించినట్లు వెల్లడించారు.

ఈ సందర్భంగా రెడ్ సిలో సౌదీ నౌకలను లక్ష్యంగా చేసుకుని హౌతీ తిరుగుబాటుదారులు జరుపుతున్న దాడులను స్పెయిన్ ప్రధాని పెడ్రో సాంచెజ్ తీవ్రంగా ఖండించారు. అంతర్జాతీయ నౌకాయాన స్వేచ్ఛకు హౌతీల నుంచి వస్తున్న ముప్పుపై ఆందోళన వ్యక్తం చేశారు.

అలాగే సౌదీ అరేబియా భద్రత, సార్వభౌమాధికారం, జాతీయ ప్రయోజనాల పరిరక్షణ కోసం రాజ్యం చేపడుతున్న చర్యలకు స్పెయిన్ పూర్తి మద్దతు ఉంటుందని సాంచెజ్ స్పష్టం చేశారు.