దుబాయ్: ప్రయాణాన్ని పూర్తి చేయలేకపోయిన లేదా స్వదేశాలకు తిరిగి వెళ్లలేని వేలాది మందికి దుబాయ్‌లోని జనరల్ డైరెక్టరేట్ ఆఫ్ ఐడెంటిటీ అండ్ ఫారినర్స్ అఫైర్స్ (GDRFA Dubai) ఆధ్వర్యంలో నిర్వహిస్తున్న అల్ అవీర్ షెల్టరింగ్ సెంటర్ కీలక అండగా నిలుస్తోంది. 2026 తొలి ఆరు నెలల్లో ఈ కేంద్రం ద్వారా మొత్తం 11,696 మంది సహాయం పొందినట్లు జీడీఆర్‌ఎఫ్‌ఏ దుబాయ్ వెల్లడించింది.

ఈ వివరాలను అల్ అవీర్‌లోని షెల్టరింగ్ సెంటర్‌లో నిర్వహించిన మీడియా పర్యటన సందర్భంగా అధికారులు వెల్లడించారు. ఈ కార్యక్రమంలో జీడీఆర్‌ఎఫ్‌ఏ దుబాయ్ డైరెక్టర్ జనరల్ లెఫ్టినెంట్ జనరల్ మొహమ్మద్ అహ్మద్ అల్ మర్రీ, దుబాయ్ పోలీస్ క్రిమినల్ వ్యవహారాల డిప్యూటీ కమాండర్-ఇన్-చీఫ్ మేజర్ జనరల్ హరీబ్ మొహమ్మద్ అల్ షంసీ, జీడీఆర్‌ఎఫ్‌ఏ ప్రవేశ అనుమతులు, రెసిడెన్సీ విభాగం అసిస్టెంట్ డైరెక్టర్ జనరల్ మేజర్ జనరల్ ఖలఫ్ అహ్మద్ అల్ ఘైత్, ఉల్లంఘనదారులు మరియు విదేశీయుల ఫాలోఅప్ విభాగం అసిస్టెంట్ డైరెక్టర్ జనరల్ మేజర్ జనరల్ డాక్టర్ అలీ బిన్ అజీఫ్ అల్ జాబీ తదితరులు పాల్గొన్నారు.

ఆర్థిక, వైద్య, పరిపాలనా లేదా ఇతర కారణాల వల్ల స్వదేశాలకు వెంటనే వెళ్లలేని వారికి ఈ కేంద్రం తాత్కాలిక వసతి కల్పించడంతో పాటు వైద్య సేవలు, అవసరమైన పత్రాల ఏర్పాట్లు, ప్రయాణ ఏర్పాట్లు వంటి సేవలను అందిస్తోంది. ప్రతి కేసును ప్రత్యేక బృందాలు పరిశీలించి సంబంధిత ప్రభుత్వ సంస్థలు, రాయబార కార్యాలయాలు, కాన్సులేట్లు, ట్రావెల్ కంపెనీలతో సమన్వయం చేసి సమస్యలను పరిష్కరిస్తున్నాయి.

తొమ్మిది ప్రధాన సేవలు

అల్ అవీర్ షెల్టరింగ్ సెంటర్‌లో ఆరోగ్య సేవలు, సామాజిక మరియు మానవతా సహాయం, వ్యక్తిగత సంరక్షణ, వసతి, ఆహారం, భద్రత, అవగాహన కార్యక్రమాలు, వినోద కార్యక్రమాలు, వ్యక్తిగత వస్తువుల భద్రత వంటి మొత్తం తొమ్మిది ప్రధాన సేవలు అందుబాటులో ఉన్నాయి. పూర్తి సౌకర్యాలతో కూడిన వైద్య క్లినిక్‌లు ప్రాథమిక ఆరోగ్య పరీక్షలతో పాటు అవసరమైనప్పుడు నిపుణుల వైద్య సేవలను కూడా అందిస్తున్నాయి.

2026 జనవరి నుంచి జూన్ వరకు కేంద్రం ద్వారా 11,696 విమాన టికెట్లు జారీ చేయగా, 4,568 ప్రయాణ పత్రాలను సంబంధిత కాన్సులేట్ల సహకారంతో పొందింది. ఇదే కాలంలో 11,696 ప్రాథమిక వైద్య పరీక్షలు, 1,906 నిపుణుల వైద్య సంప్రదింపులు నిర్వహించారు. కేంద్రంలో నివసించిన వారికి మొత్తం 3,22,232 భోజనాలు అందించారు.

ఆఫ్రికన్ మహిళకు మానవతా సహాయం

పర్యాటక వీసాతో ఉద్యోగాన్వేషణ కోసం యూఏఈకి వచ్చిన ఓ ఆఫ్రికన్ మహిళకు ఉద్యోగం లభించకపోవడంతో పాటు ఆమె కుమార్తెకు వైద్య చికిత్స అవసరమైంది. ఈ నేపథ్యంలో తల్లీకూతుళ్లకు అల్ అవీర్ కేంద్రం వసతి, వైద్య చికిత్స, ఇతర అవసరమైన సేవలను అందించింది. అనంతరం స్వదేశానికి తిరిగి వెళ్లేందుకు అవసరమైన పత్రాలు, ప్రయాణ ఏర్పాట్లు పూర్తయ్యే వరకు వారికి అన్ని విధాలా సహకరించింది.

యూఏఈ మానవతా విలువలకు ప్రతీక

జీడీఆర్‌ఎఫ్‌ఏ దుబాయ్ డైరెక్టర్ జనరల్ లెఫ్టినెంట్ జనరల్ మొహమ్మద్ అహ్మద్ అల్ మర్రీ మాట్లాడుతూ, ఈ కేంద్రం యూఏఈ అనుసరిస్తున్న సహనం, సంఘీభావం, మానవ గౌరవానికి ఇచ్చే ప్రాధాన్యతకు ప్రతీక అని అన్నారు. దుబాయ్‌లో లభించే భద్రత, రక్షణ కేవలం పౌరులు, నివాసితులకే కాకుండా, అత్యవసర పరిస్థితుల్లో చిక్కుకుని స్వదేశాలకు వెళ్లలేని ప్రతి ఒక్కరికీ అందుబాటులో ఉంటుందని పేర్కొన్నారు.

మేజర్ జనరల్ డాక్టర్ అలీ బిన్ అజీఫ్ అల్ జాబీ మాట్లాడుతూ, వ్యక్తి కేంద్రానికి వచ్చిన నాటి నుంచి స్వదేశానికి బయలుదేరే వరకు ప్రతి అంశాన్ని ప్రత్యేక బృందాలు పర్యవేక్షిస్తాయని తెలిపారు. వైద్య సేవలు, చట్టపరమైన ప్రక్రియలు, ప్రయాణ పత్రాల జారీ, విమాన టికెట్లు, బోర్డింగ్ పాస్‌ల జారీ వంటి అన్ని సేవలను ఒకే కేంద్రం ద్వారా అందించడం వల్ల ప్రక్రియలు వేగవంతమవుతున్నాయని వివరించారు.

జీడీఆర్‌ఎఫ్‌ఏ దుబాయ్ ప్రకారం, ఈ సమగ్ర విధానం ద్వారా స్వదేశాలకు వెళ్లే ప్రక్రియలో జాప్యాలను తగ్గించడంతో పాటు, ఇబ్బందుల్లో ఉన్న వారికి గౌరవప్రదమైన వసతి, వైద్య సహాయం, పరిపాలనా సేవలు అందించడం ప్రధాన లక్ష్యంగా కొనసాగుతోంది.