అబుదాబి: సోషల్ మీడియాలో ప్రత్యక్ష ప్రసారం (లైవ్ బ్రాడ్‌కాస్ట్) సందర్భంగా యూఏఈ సంస్కృతి, సామాజిక విలువలను అవమానించే కంటెంట్‌ను ప్రచారం చేసిన ఇద్దరు వ్యక్తులపై యూఏఈ నేషనల్ మీడియా అథారిటీ (NMA) చట్టపరమైన చర్యలు తీసుకుంది.

సోమవారం విడుదల చేసిన ప్రకటనలో, ఈ ఇద్దరు వ్యక్తులు లైవ్ ప్రసారంలో యూఏఈ సంస్కృతి, నాగరిక వారసత్వం, జాతీయ గుర్తింపును అవమానించేలా కంటెంట్‌ను ప్రసారం చేసినట్లు గుర్తించినట్లు ఎన్‌ఎంఏ తెలిపింది. అంతేకాకుండా, ఆ కంటెంట్ సమాజంలో నెలకొన్న విలువలకు విరుద్ధంగా ఉందని పేర్కొంది.

ఈ ఘటనకు సంబంధించి చట్టపరమైన చర్యలు ప్రారంభించడమే కాకుండా, నిబంధనలు ఉల్లంఘించిన వారిలో ఒకరికి జారీ చేసిన పబ్లిసిటీ పర్మిట్‌ను మూడు నెలల పాటు సస్పెండ్ చేసినట్లు అధికారులు వెల్లడించారు.

ఈ సందర్భంగా నేషనల్ మీడియా అథారిటీ స్పష్టం చేస్తూ, సోషల్ మీడియా లేదా ఇతర డిజిటల్ వేదికలను కేవలం ఎక్కువ వ్యూస్, ఫాలోవర్లు లేదా ఎంగేజ్‌మెంట్ కోసం సమాజ విలువలను దెబ్బతీసేలా ఉపయోగించడాన్ని ఎట్టి పరిస్థితుల్లోనూ సహించబోమని హెచ్చరించింది.

అలాగే సమాజంలో వివాదాలు సృష్టించే, యూఏఈ జాతీయ గుర్తింపు, విలువలు, సంప్రదాయాలను దెబ్బతీసే కంటెంట్‌పై కఠిన చర్యలు కొనసాగుతాయని ఎన్‌ఎంఏ పేర్కొంది.

డిజిటల్ వేదికలను బాధ్యతాయుతంగా వినియోగించాలని, దేశ చట్టాలు, సామాజిక విలువలు, సాంస్కృతిక సంప్రదాయాలను గౌరవిస్తూ కంటెంట్‌ను ప్రచురించాలని నేషనల్ మీడియా అథారిటీ ప్రజలకు విజ్ఞప్తి చేసింది.