అమెరికా: అమెరికా ప్రభుత్వం వలసదారుల విషయంలో అత్యంత కఠినమైన నిర్ణయంతో ముందుకు వెళ్తోంది. జాతీయ భద్రతకు ముప్పు, చట్టాల ఉల్లంఘన వంటి వివిధ కారణాల నేపథ్యంలో విదేశీయులకు జారీ చేసిన దాదాపు 1,75,000కు పైగా వీసాలను రద్దు చేస్తున్నట్లు అధికారికంగా ప్రకటించింది. అధ్యక్షుడు డొనాల్డ్ ట్రంప్ నేతృత్వంలో కొనసాగుతున్న కఠినమైన సమీక్షా ప్రక్రియలో భాగంగానే ఈ భారీ చర్యలు తీసుకున్నట్లు అమెరికా విదేశాంగ శాఖ విడుదల చేసిన తాజా ‘ఫ్యాక్ట్ షీట్’ ద్వారా స్పష్టం చేసింది.

రద్దుకు గల ప్రధాన కారణాలు–నేర కార్యకలాపాలే లక్ష్యం
విదేశీయులు పాల్పడిన వివిధ చట్టవిరుద్ధ చర్యల ఆధారంగానే ఈ వీసాల రద్దు ప్రక్రియ సాగినట్లు ప్రభుత్వం వివరించింది. నేరపూరిత కార్యకలాపాలు, ఇమ్మిగ్రేషన్ నిబంధనల ఉల్లంఘన, మోసపూరిత పద్ధతులు, జాతీయ భద్రతకు హాని కలిగించడం, అమెరికన్లపై హింసను ప్రేరేపించడం వంటి తీవ్రమైన అంశాలను పరిగణలోకి తీసుకున్నారు. ముఖ్యంగా దర్యాప్తు సంస్థల నుంచి అందిన పక్కా సమాచారంతోనే ఈ రద్దులు జరిగాయి. ఇందులో డ్రైవింగ్ అండర్ ఇన్‌ఫ్లుయెన్స్ (DUI), దాడులు, దొంగతనాలు, డ్రగ్స్ విక్రయాలు వంటి నేరాలకు పాల్పడిన వారు ఎక్కువగా ఉన్నారు.

తీవ్ర నేరాలు మరియు ‘బర్త్ టూరిజం’పై ఉక్కుపాదం
ఈ ఫ్యాక్ట్ షీట్‌లో మరింత తీవ్రమైన నేరాల ఉదంతాలను కూడా అమెరికా విదేశాంగ శాఖ ప్రస్తావించింది. అత్యాచారం, కిడ్నాపింగ్‌లు, మానవ అక్రమ రవాణా, చిన్నారులపై లైంగిక వేధింపుల వంటి హేయమైన నేరాలకు పాల్పడిన వారి వీసాలను క్షణం కూడా ఆలస్యం చేయకుండా రద్దు చేశారు. అంతేకాకుండా, కేవలం తమ పిల్లలకు అమెరికా పౌరసత్వం సంపాదించిపెట్టే ఉద్దేశంతో దేశంలోకి ప్రవేశించే ‘బర్త్ టూరిజం’ బాధితుల వీసాలను సైతం ఉపసంహరించుకున్నారు. విదేశాంగ విధానాల దృష్ట్యా క్యూబా, ఇరాన్, లావోస్, కువైట్ దేశాలకు చెందిన పలువురి వీసాలను రద్దు చేసినట్లు విదేశాంగ మంత్రి మార్కో రూబియో తెలిపారు.

వీసా అనేది హక్కు కాదు, అదొక వెసులుబాటు మాత్రమే
“అమెరికా వీసా అనేది ఎవరికీ జన్మహక్కు కాదు, అది కేవలం ఒక విశేష అవకాశం మాత్రమే” అని విదేశాంగ శాఖ గట్టిగా స్పష్టం చేసింది. ఇమ్మిగ్రేషన్ వ్యవస్థను స్వార్థం కోసం దుర్వినియోగం చేసే వారి నుంచి అమెరికా సమాజానికి పటిష్టమైన రక్షణ కల్పించేందుకే ఈ కఠిన చర్యలు చేపడుతున్నట్లు హెచ్చరించింది. వీసా అనేది కేవలం అమెరికాలోకి ప్రవేశించేందుకు ఇచ్చే అనుమతి పత్రం మాత్రమేనని, దేశంలోకి పూర్తిగా అనుమతించాలా లేదా అనే దానిపై తుది నిర్ణయం తీసుకునే సర్వ హక్కులు ఇమ్మిగ్రేషన్ అధికారులకే ఉంటాయని తేల్చిచెప్పింది.