అమెరికా: సేవను జీవిత లక్ష్యంగా, దాతృత్వాన్ని తమ జీవన విధానంగా మలుచుకున్న  శోభా రెడ్డి,ప్రసాద్ రెడ్డి దంపతులు భారత్‌తో పాటు అమెరికాలోనూ అనేక సామాజిక సేవా కార్యక్రమాలను చేపడుతూ ఆదర్శంగా నిలుస్తున్నారు. చిన్నారుల సంక్షేమం, విద్య, పోషకాహారం, ఆరోగ్యం, వెనుకబడిన వర్గాల అభ్యున్నతికి వారు అందిస్తున్న సహకారం పలువురి జీవితాల్లో మార్పుకు దోహదపడుతోంది.

ఇటీవల కర్ణాటకలోని బళ్లారి జిల్లాలో పాఠశాల విద్యార్థులకు పోషకాహార భోజనాన్ని సకాలంలో అందించేందుకు అవసరమైన ఆహార రవాణా వాహనాల కొనుగోలుకు శోభా రెడ్డి 25 వేల అమెరికన్ డాలర్ల విరాళాన్ని అందించారు.

అదేవిధంగా ప్రతిరోజూ సుమారు 15 వేల మంది విద్యార్థులకు పోషకాహార అల్పాహారం, మధ్యాహ్న భోజనం అందించే లక్ష్యంతో అక్షయపాత్ర ఫౌండేషన్ నిర్మించనున్న వంటశాలకు శోభా రెడ్డి, ప్రసాద్ రెడ్డి దంపతులు 2.5 లక్షల అమెరికన్ డాలర్ల విరాళాన్ని ప్రకటించారు. ఈ ప్రతిష్ఠాత్మక ప్రాజెక్టు ప్రస్తుతం ప్రణాళిక దశలో ఉండగా, నెల్లూరు సమీపంలోని వెంకటాచలం వద్ద ఐదు ఎకరాల భూమి సమీకరణ ప్రక్రియ కొనసాగుతోంది.

ఆర్థికంగా వెనుకబడిన చిన్నారులకు పాదరక్షలు

చిన్నారుల సంక్షేమంపై ప్రత్యేక దృష్టి సారించిన ఈ దంపతులు, ప్రథమ్ నైపుణ్యాభివృద్ధి కేంద్రాల్లో విద్యనభ్యసిస్తున్న ఆర్థికంగా వెనుకబడిన బాలబాలికలకు ఉచితంగా పాదరక్షలు అందించే కార్యక్రమాన్ని కూడా ప్రారంభించారు.

తొలి దశలో కర్ణాటక, ఆంధ్రప్రదేశ్‌లోని పది కేంద్రాల్లో ఈ కార్యక్రమాన్ని అమలు చేసి, అనంతరం దేశంలోని ఇతర రాష్ట్రాలకు విస్తరించాలనే లక్ష్యంతో ముందుకు సాగుతున్నారు.

నేత్ర వైద్య రంగంలోనూ విశేష సేవలు

ఆరోగ్య సేవల రంగంలోనూ శోభా రెడ్డి, ప్రసాద్ రెడ్డి దంపతులు గణనీయమైన సహకారం అందిస్తున్నారు. చెన్నైలోని శంకర నేత్రాలయం కోసం అత్యాధునిక మొబైల్ ఐ సర్జికల్ యూనిట్ (MESU) ఏర్పాటుకు వారు 5.5 లక్షల అమెరికన్ డాలర్ల విరాళాన్ని అందించారు.

ఈ మొబైల్ యూనిట్ ద్వారా సుమారు 500 కిలోమీటర్ల పరిధిలోని గ్రామీణ, మారుమూల ప్రాంతాలకు వెళ్లి నేత్ర వైద్య సేవలు, శస్త్రచికిత్సలు అందించే అవకాశం ఉంటుంది.

ఆంధ్రప్రదేశ్, తమిళనాడు రాష్ట్రాల్లో శంకర నేత్రాలయ యూఎస్ఏ ఆధ్వర్యంలో నిర్వహిస్తున్న నేత్ర శిబిరాలకు కూడా ఈ దంపతుల సహకారం కొనసాగుతోంది. ఇప్పటికే ఆంధ్రప్రదేశ్‌లో ఎనిమిది నేత్ర శిబిరాలు నిర్వహించగా, తొమ్మిదవ శిబిరాన్ని సెప్టెంబర్ 27 నుంచి అక్టోబర్ 6 వరకు తమిళనాడులోని శ్రీ పెరుంబుదూర్‌లో నిర్వహించేందుకు ఏర్పాట్లు జరుగుతున్నాయి.

శంకర నేత్రాలయ అభివృద్ధిలో ప్రసాద్ రెడ్డి కీలక పాత్ర

1988లో శంకర నేత్రాలయ యూఎస్ఏ ప్రారంభమైనప్పటి నుంచి ప్రసాద్ రెడ్డి సంస్థతో కలిసి సేవా కార్యక్రమాల్లో కొనసాగుతున్నారు. ప్రస్తుతం ఆయన శంకర నేత్రాలయ యూఎస్ఏకు బోర్డు అడ్వైజర్, బ్రాండ్ అంబాసిడర్గా సేవలందిస్తున్నారు. అదే సమయంలో ట్విస్టెడ్ ఎక్స్ సంస్థకు అధ్యక్షుడు, సీఈఓగా బాధ్యతలు నిర్వహిస్తున్నారు.

తన సంస్థ వార్షిక లాభాల్లో సుమారు 13 శాతాన్ని డల్లాస్ ప్రాంతంలోని స్వచ్ఛంద సంస్థలకు విరాళంగా అందిస్తున్నట్లు సమాచారం. ఈ విరాళాల విలువ ఏటా 20 లక్షల అమెరికన్ డాలర్లకు పైగా ఉంటుందని పేర్కొన్నారు.

పలు ప్రతిష్ఠాత్మక పురస్కారాలు

సమాజ సేవలో ప్రసాద్ రెడ్డి అందిస్తున్న విశేష కృషికి ఇప్పటికే పలు గౌరవాలు లభించాయి. న్యూజెర్సీ రాష్ట్ర సెనెట్, అసెంబ్లీ సంయుక్త తీర్మానం ద్వారా ఆయనను సత్కరించాయి. శంకర నేత్రాలయ న్యూజెర్సీ నిర్వహించిన కార్యక్రమంలో ఈ గౌరవాన్ని అందించారు.

అలాగే చెన్నైలోని శంకర నేత్రాలయం ఆయనకు ప్రతిష్ఠాత్మక ‘శంకర రత్న’ పురస్కారాన్ని అందించనుంది. గతంలో రతన్ టాటా, ఇస్రో మాజీ ఛైర్మన్ డాక్టర్ మాధవన్ నాయర్, లార్సెన్ అండ్ టూబ్రో మాజీ చైర్మన్ ఏ.ఎం.నాయక్ వంటి ప్రముఖులు ఈ గౌరవాన్ని అందుకున్నారు.

సేవా ప్రస్థానానికి శోభా రెడ్డి అండ

ప్రసాద్ రెడ్డి సేవా కార్యక్రమాల వెనుక శోభా రెడ్డి ప్రోత్సాహం, సహకారం కీలకంగా నిలుస్తోంది. ప్రతి సేవా కార్యక్రమంలో ఆయనకు అండగా నిలుస్తూ, సమాజానికి మరింత మేలు చేయాలనే సంకల్పాన్ని కార్యరూపంలోకి తీసుకురావడంలో ఆమె కీలక పాత్ర పోషిస్తున్నారు.

వ్యక్తిగత విజయాలకంటే సమాజానికి తిరిగి ఇవ్వడమే నిజమైన సంతృప్తి, విజయమనే సందేశాన్ని ఈ దంపతులు తమ సేవా కార్యక్రమాల ద్వారా చాటిచెబుతున్నారు. చిన్నారుల సంక్షేమం, విద్య, పోషకాహారం, ఆరోగ్య సేవలు, వెనుకబడిన వర్గాల అభ్యున్నతి కోసం వారు కొనసాగిస్తున్న సేవలు పలువురికి స్ఫూర్తిగా నిలుస్తున్నాయి.