జెడ్డా: భారత 80వ స్వాతంత్ర్య దినోత్సవం సందర్భంగా దేశ ప్రగతి, భవిష్యత్ లక్ష్యాలతో పాటు సౌదీ అరేబియాతో భారత్‌కు ఉన్న వ్యూహాత్మక భాగస్వామ్యాన్ని భారత కాన్సుల్ జనరల్ ప్రస్తావించారు. 2047 నాటికి ‘వికసిత్ భారత్’గా ఎదగాలనే లక్ష్యంతో భారత్ ఆర్థిక, సాంకేతిక, పారిశ్రామిక రంగాల్లో వేగంగా ముందుకు సాగుతోందని తెలిపారు.

2025-26లో భారత్ వాస్తవ జీడీపీ 7.7 శాతం వృద్ధిని నమోదు చేసిందని పేర్కొన్నారు. తయారీ రంగాన్ని విస్తరించడం, మౌలిక వసతులను ఆధునీకరించడం, కొత్త సాంకేతికతల్లో పెట్టుబడులు పెట్టడం ద్వారా దేశ ఆర్థిక వ్యవస్థ మరింత బలోపేతమవుతోందన్నారు. ‘మేక్ ఇన్ ఇండియా, మేక్ ఫర్ ది వరల్డ్’ ఆలోచనకు అనుగుణంగా సెమీకండక్టర్లు, అధునాతన తయారీ, క్లీన్ టెక్నాలజీలతో పాటు కృత్రిమ మేధస్సు (ఏఐ), క్వాంటమ్ టెక్నాలజీ, అడ్వాన్స్‌డ్ కంప్యూటింగ్ రంగాల్లో భారత్ సామర్థ్యాలను పెంచుకుంటోందని తెలిపారు.

అంతరిక్ష రంగంలోనూ భారత్ కొత్త దశలోకి ప్రవేశించిందని పేర్కొన్నారు. చంద్రయాన్-3, ఆదిత్య-ఎల్1 విజయాల తర్వాత గగన్‌యాన్ మానవ సహిత అంతరిక్ష ప్రయోగ కార్యక్రమం కొనసాగుతోందన్నారు. పునరుత్పాదక ఇంధన విస్తరణ, నేషనల్ గ్రీన్ హైడ్రోజన్ మిషన్ ద్వారా పర్యావరణహిత సాంకేతికత, సుస్థిర అభివృద్ధిపై భారత్ దృష్టి సారిస్తోందని తెలిపారు.

భారత్ అభివృద్ధి ప్రయాణంతో పాటు సౌదీ అరేబియాతో సంబంధాలు కూడా మరింత బలోపేతమవుతున్నాయని పేర్కొన్నారు. భారత్-సౌదీ వ్యూహాత్మక భాగస్వామ్యం రాజకీయ, ఆర్థిక, ఇంధన, రక్షణ, సాంకేతిక, సాంస్కృతిక రంగాలతో పాటు ప్రజల మధ్య సంబంధాలను కూడా కలుపుకుని విస్తరించిందన్నారు.

సౌదీ అరేబియాలో సుమారు 27 లక్షల మంది భారతీయులు నివసిస్తూ వివిధ రంగాల్లో సేవలందిస్తున్నారని తెలిపారు. వైద్యం, ఇంజినీరింగ్, విద్య, సాంకేతికత, వ్యాపారం, పరిశ్రమ, నిర్మాణ రంగాల్లో భారతీయులు కీలక పాత్ర పోషిస్తున్నారని పేర్కొన్నారు. వారి కృషి, వృత్తి నైపుణ్యం, సౌదీ చట్టాలు, సంప్రదాయాల పట్ల గౌరవం రెండు దేశాల మధ్య శాశ్వత వారధిగా నిలుస్తున్నాయని అన్నారు.

జెడ్డాలోని భారత కాన్సులేట్‌కు ఈ విస్తృత భారతీయ సమాజానికి సేవలందించడం ప్రధాన బాధ్యతగా ఉందని తెలిపారు. కాన్సులర్, కమ్యూనిటీ సంక్షేమ సేవలను మరింత సులభంగా, వేగంగా అందించేందుకు ప్రయత్నిస్తున్నామని పేర్కొన్నారు. భారతీయుల సంక్షేమానికి సౌదీ అధికారులు అందిస్తున్న సహకారాన్ని అభినందించారు.

హజ్ కారణంగా జెడ్డాకు భారత్-సౌదీ సంబంధాల్లో ప్రత్యేక ప్రాధాన్యం ఉందని తెలిపారు. హజ్ 2026 సందర్భంగా భారత, సౌదీ అధికారుల మధ్య విస్తృత సమన్వయం జరిగిందని, భారత యాత్రికులకు అవసరమైన సౌకర్యాలు, సహాయం అందించేందుకు చర్యలు చేపట్టామని వివరించారు. యాత్రికులకు సేవలు, సౌకర్యాలను మెరుగుపరచడంలో సౌదీ ప్రభుత్వం, హజ్ మరియు ఉమ్రా మంత్రిత్వ శాఖతో పాటు సంబంధిత అధికారుల సహకారానికి కృతజ్ఞతలు తెలిపారు.

యోగ, భారతీయ సినిమాలు, సంగీతం, వంటకాలకు సౌదీ అరేబియాలో మంచి ఆదరణ లభిస్తోందని తెలిపారు. ప్రయాణాలు, పర్యాటకం ద్వారా భారతీయులు, సౌదీ ప్రజలు పరస్పరం తమ సంస్కృతులను మరింతగా తెలుసుకునే అవకాశాలు పెరుగుతున్నాయని అన్నారు. ప్రజల మధ్య పెరుగుతున్న ఈ అనుబంధమే భారత్-సౌదీ భాగస్వామ్యానికి ప్రధాన బలాల్లో ఒకటని పేర్కొన్నారు.

భారత్ 80వ స్వాతంత్ర్య సంవత్సరంలోకి అడుగుపెడుతున్న నేపథ్యంలో సుసంపన్నమైన, సాంకేతికంగా అభివృద్ధి చెందిన, సుస్థిర భారత నిర్మాణం దిశగా దేశం మరింత ఆత్మవిశ్వాసంతో ముందుకు సాగుతోందని తెలిపారు. ప్రపంచానికి నమ్మకమైన భాగస్వామిగా భారత్ తన పాత్రను మరింత బలోపేతం చేసుకుంటుందని పేర్కొన్నారు.

భారత్ పట్ల స్నేహభావం, భారతీయ యాత్రికులకు అందిస్తున్న సహకారం, సౌదీలోని భారతీయ సమాజానికి అందిస్తున్న ఆదరణకు సౌదీ రాజు సల్మాన్ బిన్ అబ్దులజీజ్ అల్ సౌద్, క్రౌన్ ప్రిన్స్, ప్రధానమంత్రి మహమ్మద్ బిన్ సల్మాన్, సౌదీ ప్రభుత్వం, ప్రజలకు కృతజ్ఞతలు తెలిపారు.