వాషింగ్టన్: ఆన్‌లైన్ మోసాలను అడ్డుకునే దిశగా మెటా మరో కీలక అడుగు వేసింది. ప్రముఖ మెసేజింగ్ యాప్ వాట్సాప్‌లో ఏఐ ఆధారిత ‘స్కామ్ అలర్ట్’ ఫీచర్‌ను ప్రయోగాత్మకంగా పరీక్షిస్తోంది. ప్రస్తుతం పరిమిత స్థాయిలో అందుబాటులో ఉన్న ఈ ఆప్షనల్ ఫీచర్.. వినియోగదారులు మోసపూరిత సంభాషణల్లో చిక్కుకునే అవకాశం ఉన్నప్పుడు ముందస్తు హెచ్చరిక ఇవ్వనుంది.

టెక్‌ సంస్థ ‘ది వెర్జ్’ నివేదిక ప్రకారం, వాట్సాప్‌లో కొనసాగుతున్న చాట్ మోసపూరిత పథకంలో భాగమై ఉండొచ్చని ఏఐ గుర్తించినప్పుడు స్క్రీన్‌పై ప్రత్యేక హెచ్చరిక బ్యానర్ కనిపిస్తుంది.

మూడు ఆప్షన్లు

స్కామ్ అలర్ట్ వచ్చినప్పుడు వినియోగదారులకు వెంటనే మూడు ఎంపికలను అందిస్తుంది. అనుమానాస్పద వ్యక్తిని బ్లాక్ చేయడం, ఖాతాను రిపోర్ట్ చేయడం లేదా చాట్‌ను కొనసాగించడం వంటి ఆప్షన్లు ఉంటాయి.

ఏఐ పొరపాటున హెచ్చరిక జారీ చేసిందని వినియోగదారు భావిస్తే, ఆ సంభాషణను **‘ట్రస్టెడ్’**గా గుర్తించి, ఆ నిర్దిష్ట చాట్‌కు సంబంధించిన హెచ్చరికను తొలగించవచ్చు.

అంతేకాకుండా, ఫీచర్ పనితీరును మెరుగుపరచడంలో సహాయపడేందుకు చాట్‌లోని చివరి ఐదు మెసేజ్‌లను వాట్సాప్‌తో షేర్ చేసే అవకాశం కూడా వినియోగదారులకు ఉంటుంది.

మోసాల పై మెటా నిఘా

వాట్సాప్‌లో స్కామ్‌లను అడ్డుకునేందుకు మెటా ఇప్పటికే పలు చర్యలు చేపట్టింది. ఈ ఏడాది ప్రారంభంలో అనుమానాస్పద లింక్డ్-డివైస్ రిక్వెస్టులను గుర్తించే ఆటోమేటెడ్ స్కామ్ డిటెక్షన్ టూల్‌ను కూడా మెటా ప్రవేశపెట్టింది.

కొత్త ఏఐ స్కామ్ అలర్ట్ ఫీచర్ ద్వారా వినియోగదారులను మోసపూరిత సంభాషణలపై ముందుగానే అప్రమత్తం చేయడంతో పాటు, అనుమానాస్పద ఖాతాలను బ్లాక్ లేదా రిపోర్ట్ చేసే అవకాశాన్ని సులభతరం చేయాలని మెటా లక్ష్యంగా పెట్టుకుంది.

ప్రస్తుతం పరిమిత స్థాయిలో పరీక్షిస్తున్న ఈ ఫీచర్‌ను భవిష్యత్తులో మరింత విస్తృతంగా అందుబాటులోకి తీసుకురావడంపై మెటా నిర్ణయం తీసుకోనుంది.