రియాద్: సౌదీ అరేబియాలో కొత్త విద్యా సంవత్సరం ప్రారంభానికి ముందు విద్యార్థులకు పాఠశాల రవాణా సేవలపై విద్యాశాఖ కీలక మార్గదర్శకాలు జారీ చేసింది. స్కూల్ బస్సుల్లో భద్రత, ప్రవర్తనా నిబంధనలు తప్పనిసరిగా పాటించాలని స్పష్టం చేసింది. నిబంధనలు ఉల్లంఘిస్తే విద్యార్థిని తాత్కాలికంగా లేదా పూర్తి విద్యా సంవత్సరం పాటు స్కూల్ రవాణా సేవల నుంచి సస్పెండ్ చేసే అవకాశం ఉందని తెలిపింది. అలా సస్పెండ్ చేసినా రిజిస్ట్రేషన్ ఫీజు తిరిగి చెల్లించబోమని పేర్కొంది.

కొత్త విద్యా సంవత్సరం 1448 హిజ్రీకి సంబంధించి మూడు విద్యా దశల్లోని బాలబాలికల నుంచి స్కూల్ రవాణా సేవల కోసం నూర్ ఎలక్ట్రానిక్ సిస్టమ్ ద్వారా దరఖాస్తులను స్వీకరిస్తున్నారు. సామాజిక భద్రతా లబ్ధిదారుల పిల్లలు, దివ్యాంగ విద్యార్థులకు వార్షిక రవాణా రుసుము SR200 నుంచి మినహాయింపు కల్పించారు. విద్యార్థులు నిర్దేశించిన ప్రదేశాల్లోనే బస్సు కోసం వేచి ఉండాలి. బస్సులోకి ఎక్కేటప్పుడు, దిగేటప్పుడు క్రమశిక్షణ పాటించాలి. కేటాయించిన సీట్లలో కూర్చొని సీటు బెల్టు ధరించాలి. డ్రైవర్ సూచనలను తప్పనిసరిగా పాటించాలి.

బస్సు కిటికీలు లేదా తలుపుల నుంచి తల, చేతులు లేదా శరీరంలోని ఇతర భాగాలను బయటకు పెట్టకూడదు. ప్రమాదకరమైన వస్తువులను బస్సులోకి తీసుకురావద్దని విద్యాశాఖ సూచించింది. బస్సు, దానిలోని సదుపాయాలు, ఇతరుల వస్తువులను విద్యార్థులు జాగ్రత్తగా చూసుకోవాలని శాఖ తెలిపింది. బస్సును ఎవరైనా దుర్వినియోగం చేస్తున్నట్లు కనిపించినా, నిర్దేశిత స్టాప్‌ను బస్సు దాటిపోయినా వెంటనే డ్రైవర్‌కు సమాచారం ఇవ్వాలని సూచించింది.

బస్సు పూర్తిగా ఆగిన తర్వాతే విద్యార్థులు దిగాలి. బస్సు ముందు నుంచి రోడ్డు దాటకూడదు. బస్సు ముందుకు వెళ్లిపోయిన తర్వాత రహదారి పూర్తిగా ఖాళీగా ఉందని నిర్ధారించుకుని మాత్రమే రోడ్డు దాటాలని స్పష్టం చేసింది. ప్రమాదం లేదా ఇతర అత్యవసర పరిస్థితులు ఎదురైతే డ్రైవర్ సూచనలను పాటించాలని విద్యాశాఖ పేర్కొంది. అవసరమైతే అత్యవసర ద్వారాలను ఉపయోగించి ప్రశాంతంగా, క్రమబద్ధంగా బస్సు నుంచి బయటకు రావాలని సూచించింది.

పాఠశాల బస్సుల్లో తల్లిదండ్రులు ఎక్కకూడదని విద్యాశాఖ స్పష్టం చేసింది. ఏవైనా సమస్యలు లేదా ఫిర్యాదులు ఉంటే పాఠశాల రవాణా పర్యవేక్షకుడికి తెలియజేయాలని లేదా ఎడ్యుకేషనల్ ట్రాన్స్‌పోర్టేషన్ డెవలప్‌మెంట్ కంపెనీ టోల్‌ఫ్రీ నంబర్ ద్వారా ఫిర్యాదు చేయాలని సూచించింది. అలాగే కంపెనీ నిర్దేశించిన బస్సు మార్గాల్లో తల్లిదండ్రులు జోక్యం చేసుకోవద్దని విద్యాశాఖ స్పష్టం చేసింది.