దోహా: ఖతార్‌లో అధిక ఉష్ణోగ్రతల మధ్య విద్యార్థులు పాఠశాలలకు తిరిగి వెళ్తున్న నేపథ్యంలో.. వేడి తీవ్రత నుంచి పిల్లలను రక్షించేందుకు తల్లిదండ్రులు, విద్యార్థులు జాగ్రత్తలు పాటించాలని కార్మిక మంత్రిత్వ శాఖ సూచించింది.
సోషల్ మీడియాలో విడుదల చేసిన అవగాహన మేసేజ్ లో.. పిల్లలను ఎండ నుంచి రక్షించడం తల్లిదండ్రులు, కుటుంబ సభ్యుల ఉమ్మడి బాధ్యత అని మంత్రిత్వ శాఖ పేర్కొంది. విద్యార్థులు రోజును తగినంత నీరు తాగడంతో ప్రారంభించేలా చూడాలని సూచించింది. 

అలాగే ఎక్కువసేపు నేరుగా ఎండలో నిలబడకుండా ఉండాల్సిన ప్రాధాన్యతను పిల్లలకు వివరించాలని తెలిపింది. విద్యా, ఉన్నత విద్యా మంత్రిత్వ శాఖ సహకారంతో చేపట్టిన ఈ అవగాహన కార్యక్రమంలో.. స్కూల్ బస్సుల కోసం వేచి ఉండే విద్యార్థులు నేరుగా ఎండలో నిలబడకుండా నీడ ఉన్న ప్రదేశాల్లో ఉండాలని సూచించారు. శరీరంలో నీటి శాతం తగ్గకుండా ఉండేందుకు క్రమం తప్పకుండా నీరు తాగాలని విద్యార్థులకు సూచించారు.
ఈ సాధారణ జాగ్రత్తలను పాటించడం ద్వారా విద్యార్థులు పాఠశాలలకు ఉత్సాహంగా, సురక్షితంగా తిరిగి వెళ్లవచ్చని మంత్రిత్వ శాఖ తెలిపింది. అదే సమయంలో అధిక ఉష్ణోగ్రతల కారణంగా ఎదురయ్యే హీట్ స్ట్రెస్ ముప్పును తగ్గించవచ్చని పేర్కొంది.
ఈ అవగాహన కార్యక్రమానికి “Heat fades… Safety stays.” అనే దానిని ప్రచార నినాదంగా ఉపయోగిస్తున్నారు.