మూవింగ్ డ్రీమ్స్ ఇండియా ప్రైవేట్ లిమిటెడ్ బ్యానర్ పై మేరుం భాస్కర్ నిర్మాణంలో జై జ్ఞాన ప్రభ తోట దర్శకత్వంలో తెరకెక్కుతున్న సినిమా ధర్మస్థల నియోజకవర్గం. సుమన్, సాయికుమార్, నటరాజ్, రాయంచ కొక్కుర, వితికా షేరు.. పలువురు కీలక పాత్రల్లో నటిస్తున్నారు. పొలిటికల్ ఎంటర్‌టైనర్ గా తెరకెక్కిన ధర్మస్థల నియోజకవర్గం సినిమా సెప్టెంబర్ 4న థియేటర్స్ లో రిలీజ్ కానుంది. తాజాగా ఈ సినిమా ట్రైలర్ రిలీజ్ చేసారు.

ట్రైలర్ లాంచ్ ఈవెంట్లో నిర్మాత మేరుం భాస్కర్ మాట్లాడుతూ.. ముందుగానే అనుకున్నట్లుగా 45 రోజుల్లోనే షూటింగ్ పూర్తి చేసి పర్ఫెక్ట్ అవుట్ పుట్ తీసుకొచ్చాం అని తెలిపారు. హీరోయిన్ వితికా షేరు మాట్లాడుతూ.. ఈ సినిమాలోని పాటలు విన్న తర్వాతే కథ విన్నాను. ఇన్నాళ్లు సినిమాలకు గ్యాప్ ఇచ్చాను. ఈ సినిమాలో డిఫరెంట్ క్యారెక్టర్ వచ్చింది కాబట్టే ఒప్పుకున్నాను అని తెలిపారు.

డైరెక్టర్ జై జ్ఞాన ప్రభ మాట్లాడుతూ,, మా సినిమాలో మంచి కథతో పాటు మంచి సాంగ్స్ కూడా కుదిరాయి. నీరంతా భాస్కర్ గారు ఎక్కడా కాంప్రమైజ్ కాకుండా సినిమాను రూపొందించారు. ఈ సినిమా ప్రేక్షకుల్ని ఏమాత్రం నిరాశపర్చదు అని అన్నారు. నటుడు నటరాజ్ మాట్లాడుతూ.. డైరెక్టర్ జ్ఞాన ప్రభ గారు గతంలో నాలుగైదు సినిమాలు చేసి మాకు చెప్పకుండా దాచారేమో అనిపిస్తోంది. అంత అనుభవం ఉన్న దర్శకుడిలా ఈ సినిమాను రూపొందించారు. వితిక, శివకుమార్ కాంబినేషన్ లో నాకు ఎక్కువ సీన్స్ ఉన్నాయి అని తెలిపారు.

లిరిక్ రైటర్ చంద్రబోస్ మాట్లాడుతూ.. ఈ సినిమాలో ఐదు మంచి సాంగ్స్ రాసే సందర్భాలు కల్పించారు. రంగస్థలం తర్వాత నాకు పాటల పరంగా అంత సంతృప్తిని, సంతోషాన్ని కలిగించిన సినిమా ధర్మస్థల నియోజకవర్గం. నేను రాసిన పాటలకు మహావీర్ తన సంగీతంతో ప్రాణం పోశాడు. ప్రతిఘటనలో విజయశాంతికి ఎలాంటి క్యారెక్టర్ వచ్చిందో ఈ సినిమాలో వితికకు అలాంటి పవర్ ఫుల్ రోల్ లభించింది. ఆమె చుట్టూనే కథంతా తిరుగుతుంటుంది అని అన్నారు.