అమెరికా, ఇరాన్ మధ్య మిడిల్ ఈస్ట్ లో మరోసారి ఘర్షణ తీవ్రరూపం దాల్చింది. తమ యుద్ధనౌకపై ఇరాన్ రెండుసార్లు బాలిస్టిక్ క్షిపణులతో దాడికి యత్నించగా, దానికి ప్రతీకారంగా అమెరికా బలగాలు ఇరాన్‌కు చెందిన ఐదు భారీ ఆయిల్ ట్యాంకర్లను ధ్వంసం చేశాయి. యూఎస్ సెంట్రల్ కమాండ్ (సెంట్‌కామ్) వెల్లడించిన వివరాల ప్రకారం.. ఒమన్ గల్ఫ్‌లో కావిజ్, చార్మినార్, హొరైజన్ 1, రీస్కో నౌకలతో పాటు, ఖర్గ్ ద్వీపం సమీపంలోని దర్యా ట్యాంకర్‌ను లక్ష్యంగా చేసుకుని ఈ దాడులు జరిపారు.

సిబ్బందిని సురక్షితంగా పంపి ఆయిల్ ట్యాంకర్ల పై యూఎస్ దాడులు
ట్యాంకర్లలోని సిబ్బందిని ముందుగానే నౌకలను విడిచి వెళ్లాలని హెచ్చరించి ఆదేశించిన తర్వాతే అమెరికా సైన్యం వాటిని పనిచేయకుండా ధ్వంసం చేసింది. ఇస్లామిక్ రివల్యూషనరీ గార్డ్ కార్ప్స్ (ఐఆర్‌జీసీ) మరియు దాని అనుబంధ సంస్థలకు నిధులు సమకూర్చేందుకే ఈ ట్యాంకర్లను వినియోగిస్తున్నట్లు అమెరికా ఆరోపించింది. ఈ ఘటనలో తమ సిబ్బందికి ఎటువంటి ప్రాణనష్టం జరగలేదని, ఇరాన్ క్షిపణి దాడుల నుంచి తమ యుద్ధనౌక సురక్షితంగా బయటపడిందని సెంట్‌కామ్ స్పష్టం చేసింది.

జోర్డాన్‌లోని అమెరికా వైమానిక స్థావరం పై ఇరాన్ క్షిపణి దాడులు
అమెరికా చర్యకు వ్యతిరేకంగా ఇరాన్ వెంటనే ప్రతిస్పందించింది. జోర్డాన్‌లోని అల్ అజ్రాక్ వైమానిక స్థావరం (మువఫాక్ సాల్టి ఎయిర్‌బేస్)పై ఐఆర్‌జీసీ క్షిపణి దాడులు నిర్వహించింది. ఈ స్థావరంలోని షెల్టర్లు, ఫైటర్ ఎయిర్‌క్రాఫ్ట్ నిర్వహణ ప్రాంతాలను లక్ష్యంగా చేసుకుని దాడులు చేసినట్లు ప్రకటించింది. అయితే ఇరాన్ ప్రయోగించిన 20 బాలిస్టిక్ క్షిపణులలో 18 క్షిపణులను జోర్డాన్ వాయు రక్షణ వ్యవస్థ సమర్థవంతంగా కూల్చివేసింది.

జనావాసాల్లో పడని క్షిపణులు..ఎలాంటి ప్రాణనష్టం లేదు
మిగిలిన రెండు క్షిపణులు జనావాసాలు లేని ఖాళీ ప్రాంతాల్లో పడటంతో పెను ప్రమాదం తప్పింది. ఈ ఘటనలో ఎలాంటి ప్రాణనష్టం గానీ, ఆస్తినష్టం గానీ జరగలేదని జోర్డాన్ సైన్యం అధికారికంగా వెల్లడించింది. మరోవైపు కువైట్, బహ్రెయిన్ ఓడరేవుల సమీపంలోని ఆయిల్ ట్యాంకర్ల సిబ్బందికి ఇరాన్ తీవ్ర హెచ్చరికలు జారీ చేయడం గల్ఫ్ ప్రాంతంలో మరింత కలకలం రేపుతోంది.

హర్మూజ్ జలసంధిలో ఆందోళనలు: 100 డాలర్లకు చేరువైన క్రూడ్ ఆయిల్ ధర
ఈ వరుస పరిణామాలతో అత్యంత కీలకమైన హర్మూజ్ జలసంధి ద్వారా చమురు రవాణాపై తీవ్రమైన ఆందోళనలు వ్యక్తమవుతున్నాయి. దీని ప్రభావంతో బ్రెంట్ క్రూడ్ ఆయిల్ ధర బ్యారెల్‌కు 100 డాలర్ల మార్కుకు చేరువైంది. గత ఆరు నెలలుగా కొనసాగుతున్న ఈ ఉద్రిక్తతలను దీటుగా ఎదుర్కొంటామని, ఇరాన్ దాడులను తిప్పికొడుతూ వారి ఆయిల్ ట్యాంకర్లనే టార్గెట్ చేస్తామని అమెరికా ఉన్నతాధికారులు హెచ్చరించారు.