అబుదాబి: తన సంరక్షణలో ఉన్న మూడేళ్ల బాలుడిపై దాడి చేసిన నానీకి అబుదాబి కోర్టు ఒక నెల జైలు శిక్షను సస్పెండ్ చేయడంతో పాటు Dh3,000 జరిమానా విధించింది. బాలుడి శారీరక భద్రతకు ముప్పు కలిగించిన కేసులో ఆమె దోషిగా తేలింది. దాడి కారణంగా బాలుడి ఛాతిపై, దవడ కింది భాగంలో పలు గాయాల గుర్తులు, గీతలు ఏర్పడ్డాయని కేసు విచారణ సందర్భంగా సమర్పించిన వైద్య నివేదికలో వెల్లడైంది.

Dh25,000 పరిహారానికి డిమాండ్

క్రిమినల్ కేసులో తుది తీర్పు వెలువడిన తర్వాత బాలుడి తల్లి నానీపై సివిల్ కేసు దాఖలు చేసింది. తనకు, తన కుమారుడికి జరిగిన ఆర్థిక, మానసిక నష్టానికి Dh25,000 పరిహారం చెల్లించాలని కోర్టును కోరింది. తాను బయట ఉన్న సమయంలో బాలుడిని జాగ్రత్తగా చూసుకోవాలని నానీని నమ్మి బాధ్యత అప్పగించానని తల్లి కోర్టుకు తెలిపింది. అయితే నానీ ఆ బాధ్యతను ఉల్లంఘించి బాలుడిపై దాడి చేసిందని పేర్కొంది.

నానీ వాదనను తిరస్కరించిన కోర్టు

అయితే నానీ తనను బాలుడి సంరక్షణ కోసం నియమించలేదని, కేవలం డ్రైవర్‌గా మాత్రమే పనిచేశానని వాదించింది. జీతాలు, ఇతర ఉద్యోగ ఒప్పంద అంశాలపై ఏర్పడిన వివాదం కారణంగానే తనపై ఈ కేసు పెట్టారని పేర్కొంది. అయితే ఈ వాదనను కోర్టు తిరస్కరించింది. బాలుడిపై దాడి జరిగిందనే అంశం ఇప్పటికే అబుదాబి క్రిమినల్ కోర్టు తుది తీర్పుతో నిర్ధారణ అయిందని పేర్కొంది.క్రిమినల్ కేసులో తుది తీర్పు వెలువడిన తర్వాత అదే దాడి జరగలేదని సివిల్ కేసులో మళ్లీ వాదించే అవకాశం లేదని న్యాయమూర్తులు స్పష్టం చేశారు.

Dh10,000 పరిహారం

పరిహారం నిర్ణయించే సమయంలో బాలుడికి ఏర్పడిన గాయాలు, చికిత్సకు అయిన వైద్య ఖర్చులను కోర్టు పరిగణనలోకి తీసుకుంది. అలాగే ఘటన తర్వాత బాలుడు, అతని తల్లి ఎదుర్కొన్న మానసిక వేదన, బాధ, నమ్మకం కోల్పోవడం వంటి అంశాలను కూడా పరిగణనలోకి తీసుకుంది. బాలుడి భద్రతకు బాధ్యత వహించాల్సిన వ్యక్తే అతనిపై దాడి చేయడం వల్ల ఇద్దరూ మానసికంగా ప్రభావితమయ్యారని కోర్టు పేర్కొంది.

చివరగా నానీ బాలుడి తల్లికి Dh10,000ను ఆర్థిక, నైతిక నష్టపరిహారంగా చెల్లించాలని ఆదేశించింది. దీనికి అదనంగా కోర్టు ఫీజులు, న్యాయ ఖర్చులను కూడా ఆమె భరించాలని తెలిపింది.  సివిల్ తీర్పు తుది అయిన తేదీ నుంచి పరిహారం పూర్తిగా చెల్లించే వరకు ఏటా 4 శాతం వడ్డీ కూడా చెల్లించాలని పేర్కొంది. అయితే ఈ వడ్డీ మొత్తం అసలు పరిహారం మొత్తాన్ని మించకూడదని కోర్టు తన తీర్పులో స్పష్టం చేసింది.