ధనుష్‌, రిచా గంగోపాధ్యాయ నాయకానాయికలుగా శ్రీరాఘవ దర్శకత్వంలో తమిళంలో రూపొందిన 'మయక్కం ఎన్నా' చిత్రం ఇప్పుడు తెలుగులో 'మిస్టర్‌ కార్తీక్‌' పేరుతో అనువాదమవుతోంది. దీనికి జి.వి.ప్రకాష్‌ సంగీతాన్ని అందించారు. ఓం శివగంగ ఎంటర్‌ప్రైజెస్‌ పతాకంపై కె.బాబూరావు, కె.మల్లికార్జున్‌లు తెలుగు ప్రేక్షకులకు అందిస్తున్న ఈ చిత్రం ఆడియో వేడుక హైదరాబాద్‌లో జరిగింది. అతిథిగా విచ్చేసిన నిర్మాత సి.కల్యాణ్‌ ఆడియో సీడీలను ఆవిష్కరించి, మరో అతిథిగా పాల్గొన్న నిర్మాత ఆర్‌.కె.గౌడ్‌కు అందించారు. థియేట్రికల్‌ ట్రైలర్‌ను వి.సముద్ర, రాజ్‌ కందుకూరిలు ఆవిష్కరించారు. శివరంజని మ్యూజిక్‌ ద్వారా ఈ ఆడియో విడుదలైంది.ఈ సందర్భంగా చిత్ర నిర్మాతలు మాట్లాడుతూ, "తమిళంలో ప్రేక్షకుల ఆదరణను చూరగొన్న చిత్రమిది. ప్రేమ, వినోదాత్మక కుటుంబ అంశాలతో రూపొందిన ఈ చిత్రం తెలుగు ప్రేక్షకులను సైతం ఆకట్టుకుంటుందన్న నమ్మకం ఉంది. సి.కల్యాణ్‌ ప్రోత్సాహంతోనే మేము నిర్మాతలుగా మారి ఈ చిత్రాన్ని అందిస్తున్నాం. ధనుష్‌ అభినయం, దర్శకుడు శ్రీరాఘవ ప్రతిభను గురించి ప్రత్యేకంగా చెప్పనవసరం లేదు" అని అన్నారు.ఇంకా ఈ కార్యక్రమంలో దర్శకులు నగేష్‌ నారదాసి, భూషణ్‌, మాటల రచయిత వెంకట్‌ మల్లూరి తదితరులు పాల్గొన్నారు.