భారత క్రీడా ప్రపంచంలో తీవ్ర విషాద ఛాయలు అలముకున్నాయి. ఆసియా పారా గేమ్స్‌లో భారత్‌కు మూడు స్వర్ణ పతకాలు అందించి దేశ కీర్తిని అంతర్జాతీయ స్థాయిలో నిలిపిన స్టార్ అథ్లెట్ నీరజ్ యాదవ్ (42) బలవన్మరణానికి పాల్పడ్డారు. ఢిల్లీలోని తన నివాసంలో బుధవారం నాడు ఆయన విషం తీసుకుని ఆత్మహత్య చేసుకున్నట్లు అధికారులు వెల్లడించారు. ఈ సమాచారం తెలిసిన వెంటనే క్రీడా లోకం తీవ్ర దిగ్భ్రాంతికి గురైంది. ప్రస్తుతం ఆయన మృతదేహాన్ని పోస్ట్‌మార్టం నిమిత్తం ఢిల్లీలోని ఆసుపత్రికి తరలించారు.

డోపింగ్ నిషేధంతో తీవ్ర మానసిక ఒత్తిడి..పారా-అథ్లెటిక్స్ కోచ్ స్పందన

నీరజ్ యాదవ్ ఆత్మహత్య వార్తను భారత పారా-అథ్లెటిక్స్ జట్టు హెడ్ కోచ్ ఎస్. సత్యనారాయణ ధ్రువీకరించారు. డోపింగ్ నిషేధం కారణంగా ఇటీవల జరిగిన ఆసియా పారా గేమ్స్‌కు నీరజ్ అర్హత కోల్పోయాడని, ఈ క్రమంలో తీవ్రమైన మానసిక ఒత్తిడికి గురై ఆయన ఈ తీవ్ర నిర్ణయం తీసుకుని ఉండవచ్చని భావిస్తున్నారు. ఒక క్రీడాకారుడు గెలుపోటములను సమానంగా స్వీకరించగలగాలి. ఆయన ఇలాంటి నిర్ణయం తీసుకోవడం విచారకరం అని కోచ్ సత్యనారాయణ ఆవేదన వ్యక్తం చేశారు. అయితే, ఆత్మహత్యకు గల కచ్చితమైన కారణాలపై పోలీసులు ఇంకా దర్యాప్తు జరుపుతున్నారు.

వైకల్యాన్ని జయించి స్వర్ణ పతకాలతో చరిత్ర సృష్టించిన వీరుడు

ఏడేళ్ల వయసులోనే పోస్ట్-పోలియో రెసిడ్యువల్ ప్యారాలిసిస్‌కు గురైన నీరజ్ యాదవ్, మొదట వీల్‌చైర్ టెన్నిస్‌లో రాణించి ఆ తర్వాత పారా-అథ్లెటిక్స్‌లోకి అడుగుపెట్టారు. F55 కేటగిరీలో (సీటెడ్ షాట్ పుట్, డిస్కస్, జావెలిన్) పోటీపడుతూ అద్భుత ప్రదర్శన కనబరిచారు. 2018 జకార్తా ఆసియా పారా గేమ్స్‌లో జావెలిన్ త్రోలో స్వర్ణం సాధించిన ఆయన, 2023 హాంగ్‌జౌ ఆసియా పారా గేమ్స్‌లో జావెలిన్, డిస్కస్ త్రో విభాగాల్లో ఏకంగా రెండు స్వర్ణ పతకాలు గెలుచుకుని భారత్ గర్వించేలా చేశారు.