దోహా: అరేబియా గల్ఫ్‌లో ప్రయాణిస్తున్న ఖతార్‌కు చెందిన ఎల్‌ఎన్‌జీ (LNG) రవాణా నౌక ‘అల్ మయేదా’పై జరిగిన దాడిని ఖతార్ ప్రభుత్వం తీవ్రంగా ఖండించింది. ఈ దాడి సముద్ర రవాణా భద్రతకు, ప్రపంచ ఇంధన సరఫరాలకు ముప్పుగా పరిణమిస్తుందని ఆందోళన వ్యక్తం చేసింది.

ఖతార్ గ్యాస్ ట్రాన్స్‌పోర్ట్ కంపెనీ (నకిలాత్)కు చెందిన ఈ నౌక అరేబియా గల్ఫ్‌లో ప్రయాణిస్తుండగా దాడి జరిగినట్లు ఖతార్ విదేశాంగ మంత్రిత్వ శాఖ వెల్లడించింది. ఈ ఘటనకు సంబంధించిన పరిస్థితులను తెలుసుకోవడానికి, బాధ్యులను గుర్తించడానికి సంబంధిత అధికారులు ఇప్పటికే దర్యాప్తు ప్రారంభించినట్లు తెలిపింది.

అంతర్జాతీయ చట్టాలు, ఐక్యరాజ్యసమితి (ఐరాస) చార్టర్‌కు అనుగుణంగా తమ ఆస్తులను రక్షించుకోవడానికి, జాతీయ ప్రయోజనాలను కాపాడుకోవడానికి, నౌకలు, సిబ్బంది భద్రతను నిర్ధారించడానికి అవసరమైన అన్ని చర్యలు తీసుకునే హక్కు తమకు ఉందని ఖతార్ స్పష్టం చేసింది.

ఇలాంటి బాధ్యతారహిత చర్యలు ప్రాంతీయ భద్రత, స్థిరత్వంతో పాటు ప్రపంచ ఆర్థిక వ్యవస్థపై తీవ్ర ప్రభావం చూపే ప్రమాదం ఉందని హెచ్చరించింది. ముఖ్యంగా ఇంధన రవాణా నౌకలపై దాడుల వల్ల సముద్ర పర్యావరణానికి ముప్పు ఏర్పడటమే కాకుండా, గల్ఫ్ ప్రాంత దేశాల నీటి భద్రతపైనా ప్రతికూల ప్రభావం పడే అవకాశం ఉందని ఖతార్ విదేశాంగ శాఖ ఆందోళన వ్యక్తం చేసింది.