మనామా: బహ్రెయిన్‌లో నివసిస్తున్న ప్రవాసులకు కొత్త ఆరోగ్య బీమా నిబంధనలు అమల్లోకి వచ్చాయి. ఇకపై కొన్ని వైద్య చికిత్సలకు అయ్యే ఖర్చుల్లో ప్రవాసులు 20 శాతం నుంచి గరిష్ఠంగా 60 శాతం వరకు తమ జేబు నుంచి చెల్లించాల్సి ఉంటుంది. కొత్త నిబంధనల ప్రకారం ఒక్కో వ్యక్తికి ఏడాదికి గరిష్ఠంగా BD15,000 వరకు బీమా కవరేజీ లభిస్తుంది. అయితే అత్యవసర వైద్య చికిత్సలకు మాత్రం పూర్తి స్థాయిలో బీమా వర్తిస్తుంది. అక్టోబర్ 31 నుంచి అమల్లోకి వచ్చిన ఈ నిబంధనల ప్రకారం వార్షిక బీమా చెల్లింపులు పూర్తయ్యే వరకు కొత్తగా రెసిడెన్స్, వర్క్ పర్మిట్లు జారీ చేయడం లేదా వాటిని రెన్యువల్ చేయడం సాధ్యం కాదు.

ఆసుపత్రుల స్థాయిని బట్టి చెల్లింపులు

కొత్త విధానంలో ఆసుపత్రులను నాలుగు విభాగాలుగా వర్గీకరించారు. బ్రాంజ్ కేటగిరీ ఆసుపత్రుల్లో చికిత్స ఖర్చులో రోగులు 20 శాతం చెల్లించాలి. సిల్వర్ ఆసుపత్రుల్లో 30 శాతం, గోల్డ్ ఆసుపత్రుల్లో 45 శాతం, ప్లాటినం ఆసుపత్రుల్లో 60 శాతం వరకు రోగుల వాటాగా నిర్ణయించారు. బ్రాంజ్ ఆసుపత్రుల్లో కొన్ని చికిత్సలకు ఒక్కో సందర్శనకు BD50 వరకు గరిష్ఠ పరిమితి ఉంటుంది. అయితే మిగతా మూడు విభాగాల్లో ఆసుపత్రిలో చేరే చికిత్సలకు రోగులు చెల్లించాల్సిన మొత్తంపై ఇలాంటి పరిమితి లేదు.

ఏడాదికి BD15,000 బీమా కవరేజీ

60 ఏళ్లు దాటిన వారితో సహా ప్రతి బీమా పొందిన వ్యక్తికి ఏడాదికి BD15,000 వరకు కవరేజీ ఉంటుంది. అత్యవసర చికిత్సలు, ప్రాణాపాయ గుండె సంబంధిత సమస్యలు, ప్రమాదాలు, స్థానిక అంబులెన్స్ సేవలకు వార్షిక పరిమితిలో పూర్తి బీమా వర్తిస్తుంది. క్యాన్సర్ చికిత్సకు కూడా గరిష్ఠ వార్షిక పరిమితి వరకు కవరేజీ ఉంటుంది. అయితే ఇప్పటికే ఉన్న వ్యాధులు, దీర్ఘకాలిక అనారోగ్య సమస్యలకు కలిపి ఏడాదికి BD2,000 మాత్రమే కేటాయించారు. కిడ్నీ డయాలసిస్‌కు ఏడాదికి BD500 పరిమితి విధించారు.

మందులపై కూడా పరిమితులు

ఆమోదించిన జెనరిక్ మందుల ఖర్చులో బీమా సంస్థ 80 శాతం చెల్లిస్తుండగా, మిగిలిన 20 శాతం రోగులు భరించాలి. బ్రాండెడ్ మందుల విషయంలో బీమా కవరేజీ 60 శాతానికి పరిమితం కాగా, మిగిలిన 40 శాతం రోగులే చెల్లించాలి. ఔట్ పేషెంట్ మందులకు ఏడాదికి BD500 పరిమితి ఉంటుంది.

డాక్టర్ కన్సల్టేషన్‌కు BD5

జనరల్ ఫిజీషియన్‌ను సంప్రదించినప్పుడు ఒక్కో అపాయింట్‌మెంట్‌కు BD5 చెల్లించాలి. ఒకే అనారోగ్య సమస్యతో ఏడు రోజుల్లో అదే వైద్యుడిని మళ్లీ సంప్రదిస్తే మరోసారి ఈ రుసుము చెల్లించాల్సిన అవసరం లేదు. స్పెషలిస్ట్ వైద్యులను సంప్రదించాలంటే ముందుగా జనరల్ ఫిజీషియన్ రిఫరల్ అవసరం. బ్లడ్ టెస్టులు, స్కాన్లు ఇతర ఔట్ పేషెంట్ పరీక్షలకు ఆసుపత్రి స్థాయిని బట్టి 20 నుంచి 60 శాతం వరకు రోగుల వాటా ఉంటుంది. బ్రాంజ్ ఆసుపత్రుల్లో ఒక్కో సందర్శనకు రోగుల చెల్లింపు BD10కు పరిమితం చేశారు.

ప్రసవానికి BD500 నుంచి BD800 వరకు

18 నుంచి 45 ఏళ్ల మధ్య వయసున్న మహిళలకు గర్భధారణ, ప్రసవ సేవలకు బీమా వర్తిస్తుంది. సాధారణ ప్రసవానికి BD500, సిజేరియన్ ప్రసవానికి BD800 వరకు కవరేజీ ఉంటుంది. గర్భస్రావానికి సంబంధించిన చికిత్స కూడా సిజేరియన్ ప్రసవానికి కేటాయించిన పరిమితిలోనే ఉంటుంది. గర్భిణులకు ఎనిమిది యాంటెనాటల్ పరీక్షలు, మూడు అల్ట్రాసౌండ్ స్కాన్లకు అవకాశం కల్పించారు. ప్రతి ఔట్ పేషెంట్ అపాయింట్‌మెంట్‌కు BD5 చెల్లించాలి. నవజాత శిశువులకు పుట్టిన మొదటి 30 రోజుల వరకు వైద్య సేవలు, పరీక్షలు, టీకాలకు పూర్తి బీమా కవరేజీ ఉంటుంది.

డెంటల్, ఇతర వైద్య సేవలు

అత్యవసర దంత చికిత్సలకు పూర్తి కవరేజీ ఉంటుంది. ప్రమాదవశాత్తు సహజ దంతాలు దెబ్బతిన్నా బీమా వర్తిస్తుంది. ఫిజియోథెరపీకి ముందస్తు అనుమతితో ఆరు సెషన్ల వరకు కవరేజీ ఇస్తారు. అవసరమైతే మరో ఆరు సెషన్లకు అనుమతి పొందవచ్చు. బీమా పొందిన వ్యక్తి మరణిస్తే మృతదేహాన్ని స్వదేశానికి తరలించేందుకు BD1,000 వరకు ఆర్థిక సహాయం అందిస్తారు.

ఈ చికిత్సలకు బీమా వర్తించదు

సాధారణ ఆరోగ్య పరీక్షలు, అత్యవసరం కాని దంత చికిత్సలు, కంటి చికిత్సలు, కళ్లద్దాలు, కాంటాక్ట్ లెన్సులు, కాస్మెటిక్ సర్జరీ, ప్రత్యామ్నాయ వైద్య విధానాలకు బీమా వర్తించదు. వర్క్ పర్మిట్, రెసిడెన్స్ పర్మిట్ లేదా ప్రయాణానికి అవసరమైన వైద్య పరీక్షలు కూడా కవరేజీ పరిధిలో లేవు. అత్యవసర పరిస్థితులు మినహా చాలా వరకు మానసిక ఆరోగ్య చికిత్సలు, అల్జీమర్స్, డిమెన్షియా, వ్యసనాల చికిత్స, నిద్ర సంబంధిత సమస్యలు, బరువు తగ్గించే చికిత్సలకు కూడా బీమా వర్తించదు. బహ్రెయిన్ వెలుపల పొందే వైద్య చికిత్సలకు సైతం కవరేజీ ఉండదు.

వార్షిక బీమా చెల్లింపులు తప్పనిసరి

కొత్త నిబంధనలు ప్రవాస ఉద్యోగులు, వారి జీవిత భాగస్వాములు, 24 ఏళ్లలోపు పిల్లలకు వర్తిస్తాయి. స్వయం ఉపాధి పొందుతున్న విదేశీయులు, వ్యక్తిగత యజమానులుగా ఉన్న ప్రవాసులకు కూడా ఈ నిబంధనలు వర్తిస్తాయి. ప్రభుత్వ సంస్థల్లో పనిచేస్తున్న విదేశీ ఉద్యోగులు, వారి కుటుంబ సభ్యులకు మాత్రం మినహాయింపు ఇచ్చారు.  బీమా చెల్లింపులను ప్రతి ఏడాది ముందుగానే చెల్లించాలి. సంవత్సరంలో కొంతకాలానికి మాత్రమే బీమా తీసుకున్నా పూర్తి ఏడాది మొత్తాన్ని చెల్లించాల్సి ఉంటుంది. ఒకేసారి కొన్ని సంవత్సరాలకు చెల్లించే వెసులుబాటు కూడా ఉంది. అయితే రెసిడెన్స్ లేదా వర్క్ పర్మిట్ గడువు దాటకుండా ఉండాలి. 

లేబర్ మార్కెట్ రెగ్యులేటరీ అథారిటీ (LMRA) పర్మిట్ల జారీ, రెన్యువల్ సమయంలో ఈ మొత్తాలను వసూలు చేసి హెల్త్ ఇన్సూరెన్స్ ఫండ్‌కు అందిస్తుంది. అదనంగా ప్రైవేట్ హెల్త్ ఇన్సూరెన్స్ తీసుకున్నప్పటికీ తప్పనిసరి ప్రభుత్వ బీమా చెల్లింపుల నుంచి మినహాయింపు ఉండదని కొత్త నిబంధనలు స్పష్టం చేస్తున్నాయి. ఇప్పటికే అక్టోబర్ 31కు ముందు జారీ అయిన రెసిడెన్స్, వర్క్ పర్మిట్లు కలిగిన ప్రవాసులకు కూడా రెన్యువల్ సమయంలో ఈ కొత్త బీమా నిబంధనలు వర్తిస్తాయి.