రియాద్: హజ్ యాత్ర 2027కు సంబంధించి భారత్, సౌదీ అరేబియా దేశాల మధ్య కీలక ద్వైపాక్షిక ఒప్పందం కుదిరింది. ఈ ఒప్పందం ప్రకారం 2027లో సౌదీ అరేబియాలో జరిగే పవిత్ర హజ్ యాత్రకు భారత్‌కు 1,75,025 మంది యాత్రికుల కోటా కేటాయించారు.

భారత కేంద్ర మైనారిటీ వ్యవహారాల శాఖ మంత్రి కిరణ్ రిజిజు, సౌదీ అరేబియా హజ్ మరియు ఉమ్రా శాఖ మంత్రి డాక్టర్ తౌఫీక్ బిన్ ఫౌజాన్ అల్-రబియా మధ్య ద్వైపాక్షిక చర్చలు జరిగాయి. ఈ సమావేశంలో ఇరు దేశాల మంత్రులు హజ్ 2027కు సంబంధించిన ఒప్పందంపై సంతకాలు చేశారు.

ఈ సందర్భంగా హజ్ యాత్రకు సంబంధించిన ఏర్పాట్లపై సమీక్ష నిర్వహించారు. యాత్రికులకు అవసరమైన సౌకర్యాలు, నిర్వహణపరమైన ప్రాధాన్యతలు, భద్రతా చర్యలు, సమన్వయం వంటి కీలక అంశాలపై చర్చించారు.

భారతీయ హజ్ యాత్రికులకు సురక్షితమైన, సౌకర్యవంతమైన, ఎలాంటి ఇబ్బందులు లేకుండా యాత్రను నిర్వహించేందుకు ఇరు దేశాల మధ్య సమన్వయాన్ని మరింత బలోపేతం చేయాలని నిర్ణయించారు.

భారత్, సౌదీ అరేబియా మధ్య ఇప్పటికే కొనసాగుతున్న సన్నిహిత సంబంధాలకు ఈ ఒప్పందం మరో ముందడుగుగా నిలిచింది. 2027 హజ్ యాత్ర కోసం భారత్ నుంచి వెళ్లే 1,75,025 మంది యాత్రికులకు అవసరమైన ఏర్పాట్లను సంబంధిత అధికారులు చేపట్టనున్నారు.