కువైట్: అనుమతి పొందిన లైసెన్స్ పరిధిని దాటి బస్సులను రవాణా లేదా అద్దె సేవలకు వినియోగించవద్దని కువైట్ అంతర్గత వ్యవహారాల మంత్రిత్వ శాఖ (MOI) రవాణా సంస్థలు, వ్యక్తులను హెచ్చరించింది. ఈ మేరకు విడుదల చేసిన ప్రకటనలో, ప్రజలు లైసెన్స్ పొందిన బస్సు అద్దె సంస్థల సేవలను మాత్రమే వినియోగించుకోవాలని సూచించింది. 

అలాగే సంబంధిత సంస్థతో పాటు, రవాణాకు ఉపయోగించే బస్సుకు కూడా అందిస్తున్న సేవకు అవసరమైన అనుమతులు ఉన్నాయో లేదో నిర్ధారించుకోవాలని కోరింది. ముఖ్యంగా కార్మికులను తరలించేందుకు, పాఠశాల విద్యార్థులను రవాణా చేసేందుకు ఉపయోగించే బస్సులకు ఆయా సేవలకు సంబంధించిన ప్రత్యేక అనుమతులు తప్పనిసరిగా ఉండాలని మంత్రిత్వ శాఖ స్పష్టం చేసింది.

ప్రభుత్వ నిబంధనలు, చట్టాలను ప్రతి ఒక్కరూ పాటించడం ద్వారా ప్రజల భద్రతను కాపాడటంతో పాటు, సంబంధిత సంస్థలు, ప్రయాణికుల ప్రయోజనాలను పరిరక్షించవచ్చని పేర్కొంది.