అమెరికా యూనివర్సిటీలకు విదేశీ విద్యార్థుల దెబ్బ..
- November 16, 2026
అమెరికా: అమెరికాలో ఉన్నత విద్య అభ్యసించాలనుకునే భారతీయ విద్యార్థుల సంఖ్య తగ్గుతోంది. అధ్యక్షుడు డొనాల్డ్ ట్రంప్ ప్రభుత్వం తీసుకుంటున్న వలస విధాన నిర్ణయాలు, విదేశీయులకు ఉద్యోగ అవకాశాలపై నెలకొన్న అనిశ్చితి ఈ మార్పుకు కారణాలుగా కనిపిస్తున్నాయి. దీంతో అమెరికాకు వెళ్లే భారతీయులు, చైనా విద్యార్థుల సంఖ్య తగ్గగా.. మరోవైపు కొన్ని ఇతర దేశాల నుంచి వచ్చే విద్యార్థుల సంఖ్య పెరుగుతోంది. ఈ పరిణామాలు అమెరికా విశ్వవిద్యాలయాల ఆదాయంపైనా ప్రభావం చూపుతున్నాయి.
అమెరికాలో తగ్గుతున్న విదేశీ విద్యార్థుల ప్రవేశాలు
2025-26 విద్యా సంవత్సరంలో అమెరికాలో చదువుతున్న భారతీయ విద్యార్థుల సంఖ్య 6 శాతం తగ్గి 3,39,435కు చేరినట్లు గణాంకాలు వెల్లడిస్తున్నాయి. చైనా విద్యార్థుల సంఖ్య కూడా 4 శాతం తగ్గి 2,54,458గా నమోదైంది. మొత్తంగా అంతర్జాతీయ విద్యార్థుల సంఖ్య 18 శాతం తగ్గినట్లు నివేదిక పేర్కొంది. వలస నిబంధనల్లో మార్పులు, ఉద్యోగ అవకాశాలపై అనిశ్చితి విద్యార్థుల నిర్ణయాలను ప్రభావితం చేస్తున్నాయని విశ్లేషణలు చెబుతున్నాయి. అయితే బంగ్లాదేశ్, నేపాల్, పాకిస్థాన్, ఇటలీ వంటి దేశాల నుంచి వచ్చే విద్యార్థుల సంఖ్య పెరిగినట్లు సమాచారం.
గ్రాడ్యుయేషన్ కోర్సుల్లోనూ తగ్గిన ప్రవేశాలు
అమెరికాలో ఉన్నత విద్యకు సంబంధించి కొత్తగా చేరుతున్న విద్యార్థుల సంఖ్యలోనూ క్షీణత కనిపిస్తోంది. 2026లో గ్రాడ్యుయేషన్ కోర్సుల్లో ప్రవేశాలు 15 శాతం తగ్గగా, అండర్ గ్రాడ్యుయేషన్ కోర్సుల్లో 3 శాతం తగ్గినట్లు నివేదిక వెల్లడించింది. ఓపెన్ డోర్స్ సంస్థ అంచనాల ప్రకారం.. దాదాపు 800 విద్యాసంస్థల్లో విద్యార్థుల ప్రవేశాలు 9 శాతం వరకు తగ్గాయి. కొత్తగా చేరుతున్న అంతర్జాతీయ విద్యార్థుల సంఖ్యలో 15 శాతం క్షీణత నమోదైంది. ట్రంప్ ప్రభుత్వం తీసుకున్న విధానాల పూర్తి ప్రభావం ఇంకా స్పష్టంగా కనిపించాల్సి ఉందని ఆ సంస్థ పేర్కొంది.
ఓపీటీలో మాత్రం పెరిగిన భారతీయుల సంఖ్య
అమెరికాలో చదువుతున్న భారతీయ విద్యార్థుల సంఖ్య తగ్గినప్పటికీ, ఆప్షనల్ ప్రాక్టికల్ ట్రైనింగ్ (OPT) కార్యక్రమంలో పాల్గొంటున్న వారి సంఖ్య మాత్రం పెరిగింది. ఈ విభాగంలో భారతీయుల సంఖ్య 27 శాతం పెరిగి 1,82,201కు చేరినట్లు గణాంకాలు వెల్లడిస్తున్నాయి. 2024-25 విద్యా సంవత్సరంలో అమెరికాలో చదువుతున్న భారతీయుల సంఖ్య 3,43,019గా ఉంది. అంతకుముందు ఏడాదితో పోలిస్తే ఇది 10 శాతం ఎక్కువ. అయితే 2025-26 విద్యా సంవత్సరంలో మాత్రం ఈ సంఖ్య 6 శాతం తగ్గి 3,39,435కు చేరింది. ఒక్క ఏడాదిలోనే నమోదైన ఈ మార్పు అమెరికా విద్యారంగంలో చోటుచేసుకుంటున్న పరిణామాలను సూచిస్తోంది.
అమెరికా యూనివర్సిటీల ఆదాయం పై ప్రభావం
అంతర్జాతీయ విద్యార్థుల సంఖ్య తగ్గడం విశ్వవిద్యాలయాల ఆర్థిక పరిస్థితిపై ప్రభావం చూపుతోంది. అమెరికా వాణిజ్య శాఖ గణాంకాల ప్రకారం.. విదేశీ విద్యార్థుల నుంచి వచ్చే ఆదాయం ఏటా సుమారు 57 బిలియన్ డాలర్లుగా ఉంది. ఇందులో ట్యూషన్ ఫీజులతోపాటు విద్యార్థులు తమ వ్యక్తిగత అవసరాల కోసం చేసే ఖర్చులూ అమెరికా ఆర్థిక వ్యవస్థకు తోడ్పడుతున్నాయి. విదేశీ విద్యార్థుల్లో చాలామంది ఉన్నత విద్య పూర్తయిన తర్వాత అమెరికాలోనే ఉద్యోగాలు చేస్తున్నారు. తద్వారా అక్కడి కంపెనీలకు అవసరమైన నైపుణ్యాలు కలిగిన ఉద్యోగులు అందుబాటులోకి వస్తున్నారు. విద్యార్థుల సంఖ్య తగ్గితే ఈ ప్రతిభావంతుల ప్రవాహం పైనా ప్రభావం పడే అవకాశం ఉంది.
కోర్సుల రద్దు..ఉద్యోగుల తొలగింపు
విదేశీ విద్యార్థుల ప్రవేశాలు తగ్గడంతో కొన్ని విశ్వవిద్యాలయాలు ఖర్చులను నియంత్రించుకునే చర్యలు చేపడుతున్నాయి. ఆదాయం తగ్గిన నేపథ్యంలో కొన్ని కోర్సులను మూసివేయడం, మరికొన్నింటిని ఇతర కోర్సుల్లో విలీనం చేయడం, ఉద్యోగులను తొలగించడం వంటి నిర్ణయాలు తీసుకుంటున్నాయి. నార్త్ టెక్సాస్ యూనివర్సిటీ 70 అకడమిక్ ప్రోగ్రాములను రద్దు చేయడం లేదా ఇతర కోర్సుల్లో విలీనం చేసినట్లు సమాచారం. పెన్సిల్వేనియా స్టేట్ యూనివర్సిటీ కూడా ఖర్చుల తగ్గింపుపై దృష్టి పెట్టింది. మరోవైపు బోస్టన్ యూనివర్సిటీ ఉద్యోగులకు లేఆఫ్లు ప్రకటించినట్లు నివేదిక పేర్కొంది.
స్థానిక విద్యార్థుల పైనా ప్రభావం
విదేశీ విద్యార్థులు చెల్లించే అధిక ట్యూషన్ ఫీజుల ద్వారా వచ్చే ఆదాయాన్ని కొన్ని విశ్వవిద్యాలయాలు స్థానిక విద్యార్థులకు రాయితీలు, ఇతర సదుపాయాలు కల్పించేందుకు ఉపయోగిస్తుంటాయి. ఇప్పుడు అంతర్జాతీయ విద్యార్థుల సంఖ్య తగ్గడంతో ఈ ఆదాయంపైనా ప్రభావం పడుతోంది. ఫలితంగా స్థానిక విద్యార్థులకు గతంలో మాదిరిగా ఆర్థిక సాయం అందించడం కష్టమయ్యే అవకాశం ఉంది. ఈ పరిణామాలపై ఒహాయో స్టేట్ యూనివర్సిటీ అధ్యక్షుడు రవి వి. బెల్లంకొండ న్యూయార్క్ టైమ్స్తో మాట్లాడుతూ.. ప్రతిభావంతులను కోల్పోవడం అమెరికా ఆర్థిక వ్యవస్థకు భారంగా మారుతుందని అభిప్రాయపడ్డారు. అమెరికాకు బదులుగా యూరప్, ఆస్ట్రేలియా వంటి ప్రాంతాల్లో ఉన్నత విద్య అభ్యసించేందుకు చాలామంది విద్యార్థులు ఆసక్తి చూపుతున్నారని పేర్కొన్నారు. మొత్తంగా వలస విధానాలు, ఉద్యోగ అవకాశాలపై అనిశ్చితి, విద్యా ఖర్చులు వంటి అంశాలు అమెరికాలో అంతర్జాతీయ విద్యార్థుల ప్రవేశాలపై ప్రభావం చూపుతున్నాయి. ఈ మార్పులు కొనసాగితే అమెరికా విశ్వవిద్యాలయాల ఆదాయం, విద్యా కార్యక్రమాలు, నైపుణ్యమున్న ఉద్యోగుల లభ్యతపై మరింత ప్రభావం పడే అవకాశం ఉంది.
తాజా వార్తలు
- విజయవాడలో రామోజీ ఎక్సలెన్స్ అవార్డుల వేడుక..
- అమెరికా యూనివర్సిటీలకు విదేశీ విద్యార్థుల దెబ్బ..
- తెలంగాణ రైజింగ్ గ్లోబల్ సమ్మిట్కు షేక్ నహ్యాన్కు మంత్రి అజారుద్దీన్ ఆహ్వానం
- విశాఖలో ఎలక్ట్రిక్ సిటీ బస్సు సర్వీసులు ప్రారంభం
- ఖతార్ పాఠశాలల్లో వేధింపులకు చెక్..!!
- ఒమన్లో కొత్త ఆరోగ్య సముదాయం ప్రారంభం..!!
- కువైట్లో ఆరుగురు ఆసియా దేశస్థుల అరెస్ట్..!!
- మక్కా గ్రాండ్ మసీదులో ఉచిత సేఫ్టీ బ్రేస్లెట్లు..!!
- యూఏఈలో 2027లో తగ్గనున్న కొత్త నియామకాలు..!!
- బహ్రెయిన్లో ప్రవాసుల చేపల విక్రయాలపై నిషేధం..!!







