బంగ్లాదేశ్‌లో శనివారం ఉదయం ఘోర అగ్ని ప్రమాదం సంభవించింది. గజిపూర్‌లోని తోంగి ప్రాంతంలో ఓ ఫ్యాక్టరీలో భారీ పేలుడు జరగడంతో 10 మంది ప్రాణాలు కోల్పోయారు. మరో 20 మంది తీవ్రంగా గాయపడ్డారు. ఫ్యాక్టరీలోని బాయిలర్‌ ప్లాంట్‌లో పేలుడు సంభవించినట్లు పోలీసులు వెల్లడించారు. క్షతగాత్రులకు ఢాకా మెడికల్‌ కాలేజీ ఆస్పత్రిలో చికిత్స అందిస్తున్నారు. టెంపకో ప్యాకేజింగ్‌ ఫ్యాక్టరీలో తెల్లవారుజామున ఈ పేలుడు సంభవించినట్లు అగ్నిమాపక సిబ్బంది స్పష్టంచేశారు. వెంటనే ఘటనాస్థలికి వెళ్లి మంటలను అదుపుచేసినట్లు చెప్పారు.పలువురు కార్మికులకు తీవ్ర గాయాలవ్వడంతో మృతుల సంఖ్య పెరిగే అవకాశం ఉందని భావిస్తున్నారు. ఘటనపై దర్యాప్తు చేస్తున్నారు.