షార్జా: షార్జా ఎమిరేట్‌లో స్కూల్స్‌, ఇష్టమొచ్చినట్లుగా ఫీజుల్ని పెంచేయడానికి వీల్లేదని అధికారిక వర్గాలు తెలిపాయి. షార్జా ఎడ్యుకేషనల్‌ జోన్‌ (ఎస్‌ఇజెడ్‌ - సెజ్‌) అధికారులు ఈ మేరకు స్పష్టతనిచ్చారు. పీజుల్ని పెంచాలనుకుంటున్న విద్యా సంస్థలు, తమ సంస్థల్లో కల్పించే సౌకర్యాలను పెంచుకోవలసి ఉంటుందనీ, ఆ తర్వాత మినిస్ట్రీ నుంచి అలాగే సెజ్‌ నుంచి అనుమతి తీసుకోవాల్సి ఉంటుందని సెజ్‌ వర్గాలు తెలిపాయి. అనుమతి కోసం దరఖాస్తు చేసుకున్న తర్వాత, అధికారులు ఆ స్కూళ్ళలో పర్యటించి అక్కడ లభించే వసతుల్ని పరిశీలిస్తారు. ఆ తర్వాత స్కూళ్ళలో ఫీజు పెంపుపై ఓ నిర్ణయానికి వస్తారు. అయితే కొత్త అకడమిక్‌ ఇయర్‌ ప్రారంభమవుతుండడంతో చాలా స్కూళ్ళు ఇష్టమొచ్చినట్లుగా ఫీజుల్ని పెంచేసి, తల్లిదండ్రులపై ఆర్థిక భారం మోపేందుకు సమాయత్తమవుతున్నాయి. ఇలాంటి స్కూళ్ళపై దాడులు తప్పవని, కఠిన చర్యలు తీసుకుంటామని అధికారులు హెచ్చరించారు.