సౌదీ అరేబియా యుద్ధనౌకపై శనివారం వైమానిక దాడి జరిగింది. కాగా, ఈ ఘటనకు బాధ్యత వహిస్తున్నట్టు హౌతీ తిరుగుబాటుదారులు ప్రకటించారు. సౌదీ భద్రతా బలగాల జనరల్‌ కమాండ్‌ అందించిన వివరాల ప్రకారం...ఆదెన్‌ నుంచి మందులు, ఆహారపదార్థాలతో తరలివెళ్తున్న యుద్ధనౌకపై బాబ్‌-అల్‌ మందాబ్‌ జలసంధి సమీపంలో వైమానిక దాడి జరిగింది. ఈ దాడిలో ఆ నౌక పూర్తిగా ధ్వంసమైంది. అదృష్టవశాత్తు ఈ ఘటనలో ప్రాణనష్టం సంభవించలేదు. వైమానిక దాడికి బాధ్యత వహిస్తున్నట్టు హౌతీ తిరుగుబాటుదారులు ప్రకటించారు. సహాయక బృందాలు హుటాహుటిన ఘటనాస్థలిని సందర్శించి సహాయకచర్యలు చేపట్టాయని జనరల్‌ కమాండ్‌ కార్యాలయం వెల్లడించింది.