ఖతార్‌కి వెళ్ళేవారు తమతోపాటు కొన్ని మందుల్ని తీసుకెళ్ళడం మామూలే. చిన్న చిన్న అనారోగ్య సమస్యలతో బాధపడేవారు ఏ దేశానికి వెళ్ళినా మందుల్ని తీసుకెళుతుంటారు. అయితే ఆయా దేశాల్లో కొన్ని మందుల పట్ల నిషేధం ఉంటుంది. ఖతార్‌ కూడా అంతే. తగిన ప్రిస్క్రిప్షన్‌ని తమతో తీసుకెళితే, కొన్ని మందుల్ని దేశంలోకి అనుమతిస్తారు. హమాద్‌ ఇంటర్నేషనల్‌ ఎయిర్‌పోర్ట్‌తోపాటు అబు సమ్రా ల్యాండ్‌ బోర్డర్‌లో వైద్యుల్ని అందుబాటులో ఉంచామనీ, ఆ వైద్యులు ఆయా మందుల్ని పరీక్షిస్తారని అధికారులు తెలిపారు. ట్రమడాల్‌ వంటి మందుల్ని ఖతార్‌లో నిషేధిస్తారు. అయితే తగిన ధృవీకరణ పత్రాలు సమర్పిస్తే, కస్టమ్స్‌ అధికారులు అలాగే, పార్మసీ అండ్‌ డ్రగ్‌ కంట్రోల్‌ డిపార్ట్‌మెంట్‌ అధికారులు వాటిని పరిశీలించి, దేశంలోకి అనుమతించే విషయాన్ని పరిశీలిస్తారని హమాద్‌ ఇంటర్నేషనల్‌ ఎయిర్‌పోర్ట్‌ కస్టమ్స్‌ డిపార్ట్‌మెంట్‌ డైరెక్టర్‌ అజబ్‌ మనుర్‌ అల్‌ కహ్తాని చెప్పారు. హెర్బల్‌ మెడిసిన్స్‌ విషయంలో ఎక్కువగా అభ్యంతరాలు వ్యక్తమవుతుంటాయి. ఈ ఏడాది జనవరి నుంచి అక్టోబర్‌ 3 వరకు మొత్తం 731 నిబంధనల ఉల్లంఘనలు జరిగాయి ఈ మందుల విషయంలో.