జపాన్‌ భూప్రకంపనలతో వణికిపోతోంది. రెండు రోజుల క్రితం భారీ భూకంపంతో తల్లడిల్లిన జపాన్‌ ఈ రోజు తెల్లవారుజామున మరోసారి చిగురుటాకులా వణికింది. జపాన్‌లోని ఫుకుషిమాలో తెల్లవారుజామున 2.53 నిమిషాలకు భూకంపం సంభవించింది. రిక్టర్ స్కేల్‌పై 5.6గా భూకంప తీవ్రత నమోదైంది. ఇవాకికి 42 కిలోమీటర్ల దూరంలో భూమి కంపించింది. ఫుకుషిమాలో అణు విద్యుత్ కేంద్రం సమీపంలో భూకంపం సంభవించడంతో ప్రజలు భయాందోళనకు గురయ్యారు. ఏ నిమిషం ఏ ప్రమాదం ముంచుకొస్తుందోనని బిక్కుబిక్కుమంటూ గడుపుతున్నారు. సునామీలు, భూకంపాల నుంచి జపాన్‌కు పెను ప్రమాదం పొంచి ఉందని భూగర్భ శాస్త్రవేత్తలు హెచ్చరించారు. ప్రజలు అప్రమత్తంగా ఉండాలని సూచించారు.